Izibalo zomkhiqizo ezweni zizobaseqhulwini kuleli sonto
INTATHELI YOMBELE
NGEMVA kwesiphithiphithi sokumenyezelwa kwesinqumo ngemalimbolekomali, isonto eliqala namhlanje lizothi ukuthula kancane. Nokho namuhla into enkulu kwezomnotho kuzobayi-S&P Global purchasing managers index (iPMI), inkomba yesimo somnotho sokudingeka nokudayisa izinto, ezokhombisa ukuthi kuhamba kanjani ngenyanga edlule, ngemva kokuthi le nkomba ibimi ku-50 ngo-Agasti.
Kusasa kuzobhekwa iMonetary Policy Review (iMPR) yeBhange lomBuso. Iphuma ngemva kwamasonto amabili ikomiti elinquma imalimboleko iMonetary Policy Committee linqume ukuthi imalimboleko inyuke ngo-25 basis point ibewu-7.25%. I-MPR izocacisa kahle indlela leli bhange elibuka ngayo ukwehla kwamandla emali, umphumela wokubiza kwamanani kawoyela nokuthi inqubomgomo yezimali inamuphi umphumela emnothweni.
NgoLwesithathu kuzophuma izibalo ezisemthethweni ngamanani egolide, imali yaphesheya nezinye izimpahla okusemgodleni wezwe nokugcinwe yiBhange lomBuso.
FUNDA NALAPHA: https://www.umbele.co.za/2026/10/02/ukudayisa-izimoto-ezintsha-kukhuphuke-ngo32-izibalo-ezintsha/
Izibalo ezibalulekile zomnotho zizophuma ngoLwesine, lapho kuzomenyezelwa izibalo zomkhiqizo wango-Agasti. Umkhiqizo wamangaza uhamba kahle ngoJulayi, lapho wanyuka ngo-2,2% uma kuqhathaniswa inyanga nenyanga uma kubhekwa nesikhathi esifanayo ngonyaka odlule. Izibalo zango-Agasti zizosiza ukucacisa ukuthi ngabe uJulayi wawungukuqala kokusimama kwezinto ngekota yesithathu noma ucilo wazishaya endukwini.
Phesheya i-SMS Services PMI namhlanje izobawusizo ngemva kokuthi ibhange lombuso laseMelika iFederal Reserve Bank likhombise ukunyuka kwezinto emnothweni. Le nkomba izokhombisa ukuthi izinto zihamba kanjani emnothweni waseMelika uma uqhathaniswa neminye iminotho esimeme yakwamanye amazwe.
EYurophu izibalo zokudayisa izimpahla nomkhiqizo wezimboni zaseJalimane kuzokhombisa Isidingo sezimpahla zaseYurophu kwamanye amazwe. – Le mininingwane itholakale kwiBureau for Economic Research