IsiKhwama sokuNxephezela abalimala emsebenzini siyobhunga nabaqashi ngomthetho
INTATHELI YOMBELE
ISIKHWAMA sokuNxephezela iziSebenzi, esiwuphiko lomNyango weziSebenzi, sizobanesithangami nabaqashi abakhethiwe ukudingida izindlela zokuqinisa umthetho wokunxephezela abantu abalimala emsebenzini eMgungundlovu, KwaZulu-Natali namuhla ekuseni.
Lesi sigcawu esizoqala ngo-9 ekuseni kuze kubewu-4 ntambama eGolden Horse Hotel, sifana nezenziwe eGauteng, eMpumalanga, eMpumalanga Kapa, eNyakatho Kapa. Sizothanyelwa ngabamele uhulumeni wezwe, owesifundazwe, omasipala neHhovisi likaNdunankulu.
FUNDA NALAPHA: https://www.umbele.co.za/2023/05/16/umpumelelo-zikalala-uchaza-umthetho-onxephezela-izisebenzi-uma-zilimale-emsebenzini/
Phakathi kwezihloko ezizodingidwa kuzobayinqubo nokudingekayo ukubhalisa abaqashi abakhethiwe, izicelo zezinxephezelo, imihlomulo yezikhwama zokulashwa, izindlela zokuxazulula izinkinga zamakhasimende, izindlela zokubuyela emsebenzini nohlelo lomfundaze. Kuzobanendawo yokulekelela izisebenzi ngayo yonke imibuzo ethinta ukunxeshezelwa ngokulimala emsebenzi.
Khonamanjalo, izolo iphini likakhomishana wamaphoyisa ezweni uMnu uShadrack Sibiya ufake isicelo eNkantolo yeziSebenzi ukuvimba isigcawu somqashi iSouth African Police Service sokumqondisa ubugwegwe ngemva kwezinsolo zenkohlakalo nokungaziphathi kahle ezivele kwiKhomishini kaMadlanga.
Loku kwenzeke izolo ngesikhathi sokuhlala kwesigcawu sokumqondisa ubugwegwe. Nokho ithimba labameli bakaSibiya lifake isicelo sokuthi kuhlehliswe ukuze athole ithuba lokuxoxa nabo. Isicelo sikaSibiya semukeliwe, isigcawu sahlehliselwa uMsombuluko ozayo, umhlaka-12.
Umkhulumeli wamaphoyisa uBrigadier u-Athlenda Mathe ucashunwe yi-Eyewitness News evuma ukuthi uSibiya uye eNkantolo yeziSebenzi ukumisa isigcawu. Uthe: “Isicelo esiphuthumayo esifakwe eNkantolo yeziSebenzi silalelwe namhlanj kanti sihlehlisiwe ukunika iSAPS ithuba lokufaka amaphepha aphikisayo nokuthi ofake isicelo afake amaphepha okuphendula ngaphambi kokuthi kubuyelwe enkantolo.”