Kuleli sonto kubhekwe ngabomvu izibalo zangoSepthemba zeBhange lomBuso
INTATHELI YOMBELE
KULELI sonto eqhulwini kuzobayizibalo zangoSepthemba zeBhange lomBuso ezizophuma kusasa. Lezi zibalo zizokhombisa ukuthi ngekota yesibili yalo nyaka umnotho waseNingizimu Afrika namandla emali kuthinteke kangakanani yizinto ezenzeka phesheya, ikakhulu impi yeMelika ne-Iran nomphumela wayo kumanani kawoyela.
Lezi zibalo zikhombisa isimo semikhakha ebalulekile yomnotho, owokukhiqiza, izimayini, ezolimo, ezokwakha, ezokuhweba nesimo sokwehla kwamandla emali nokuthi abantu namabhizinisi bathenga kanjani nokuthi kumi kanjani ukutshala imali nesimo sezimali sikahulumeni.
Kulindeleke ukuthi lezi zibalo ziqhubeke nokukhombisa ukuthi amakhaya abethwele kanzima. Imali yezwe ngokomthamo womnotho wezwe yehle ngo-2.6% ngekota yesibili yonyaka, ngemva kokunyuka ngekota yokuqala.
FUNDA NALAPHA: https://www.umbele.co.za/2026/09/25/lilonke-ubunzima-lo-nyaka-emnothweni-womhlaba-nowaseningizimu-afrika-ukganyago/
Kusasa belu, kulindeleke ukuthi iStatistics South Africa (iStats SA) ikhiphe izibalo zekota yesibili yokuqashwa kwabantu ngekota yesibili. NgoLwesithathu kulindeleke ukuthi iStats SA ikhiphe izibalo zango-Agasti ze-producer price inflation, okuyisikali soshintsho ngesikhathi esithile esitholwa ngabakhiqizi ngezimpahla zabo.
Ngalo uLwesithathu futhi kulindeleke ukuthi lesi sikhungo esenza ucwaningo ezweni sikhiphe izibalo zemboni yezokuvakasha eziveza isibalo sezivakashi ezivela phesheya. Kulindeleke ukuthi ziqhubeke nokubaziningi izivakashi eziseholidini, kunezizosebenza nezizofunda eNingizimu Afrika.
NgoLwesine isikhungo sikahulumeni esiqoqa intela iSouth African Revenue Service sizokhipha izibalo zokuhwebelana kweNingizimu Afrika namanye amazwe. NgoJulayi imali esemgodleni wesikhwama sezwe yayiwuR20.1 billion, ikakhulu ngenxa yokuhweba namanye amazwe ase-Afrika. NgoLwesine kuzokhishwa i-Absa purchasing managers index yangoSepthemba, inkomba yanyanga zonke yesimo somnotho nemisebenzi eyenziwayo.