Umthetho wokuhweba nohulumeni uyashintsha
INTATHELI YOMBELE
UMTHETHO wokuhweba nohulumeni usanda kubuyekezwa. Loku kwenzeke ngemva kokuthi umengameli wezwe ugunyaze i-Public Procurement Act: 2024 , egunyazwe ngokushicilelwa emqulwini kahulumeni mhlaka-23 wangoJulayi.
Nokho lo mthetho awukaqali ukusebenza. Uyoze usebenze ngemva kokuthi umengameli ngokushaya umthetho kwi-Gazette. Isigaba 69 somthetho siyamvumela umengameli ukuthi izigaba zomthetho zisebenze kancane, kancane ngezinsuku ezihlukene nangokwemikhakha ehlukene uma kuhwetshwa neminyango kahulumeni ezweni, ezifundazweni, komasipala nezikhungo zikahulumeni.
Okwamanje uhlaka lokuthenga izimpahla nokwenza umsebenzi kuhulumeni, okulawulwa yi-Public Finance Management Act: 1999, i-Municipal Finance Management Act: 2003, i-Preferential Procurement Policy Framework Act nemithetho ehambisana nayo isazoqhubeka isebenze kuze kuqale ukusebenza i-Public Procurement Act: 2024 nemithetho ehambisana nayo.
Khonamanjalo, ngemva kwezingxoxo zangesonto elidlule, iTransnet Port Terminals nezinkampani ezithutha izimpahla baqale uhlelo olusha kuleli sonto lokubekisa indawo yamaloli eDurban Container Terminal.
Lolu hlelo luzozanywa amasonto amabili bese luqala ukusebenza uma luphumelela. Kuzosetshenziswa imishini yokulayisha amaloli ewu-16.
Okwamanje ziyisithupha izikhala zokulayisha emahoreni awu-24 lapho khona ewu-325 amaloli akwazi ukubekisa njalo emahoreni amane. Ngokohlelo olusha izikhala zokubekisa sezizoba mbili emahoreni awu-48, lapho khona kuzoba nezikhala zokubekisa eziwu-2 840 kanyekanye.
Loku kuzokwenza nokuthi izinkampani ezincane zikwazi ukuqhudelana nezikhondlakhondla ezinazo zonke izinsizakusebenza zokubekisa indawo.
- Le mininingwane ikhishwe wumNyango weziMali neTransnet Port Terminals