Isikhulu saseNingizimu Afrika siyomela iNingizimu Afrika ebhange leBrics
YINTATHELI YOMBELE
IBHODI yabaphathi beNewDevelopment Bank (iNDB), ibhange lamazwe eBrics, liqoke uMnu uMonale Ratsoma ukuthi abeyiphini likamengameli elivela eNingizimu Afrika.
Uqale lo msebenzi ngesonto elidlule kanti uzophatha izindaba ezithinta ukuvikela ibhange ebungozini, phecelezi i-chief risk officer.
FUNDA NALAPHA: https://www.umbele.co.za/2026/05/04/ukugada-ingozi-yinto-ayizwa-emithanjeni-yegazi/
Kulesi sikhundla sakhe esisha uRatsoma uzoqinisekisa ukuthi imali itshaleka ezindaweni ezifanele, aze namasu azosimamisa ibhange, inqubomgomo, engamele ezokusebenzisana futhi eqinisekisa ukuthi kulandelwa imithetho yokuvikela imvelo, ukusimamisa umphakathi nokuthi kuphethwe ngendlela efanele.
UmGcinimafa umchaze njengomholi owaziyo umsebenzi wakhe futhi onamasu okuphatha izimali emhlabeni, unamava eminyaka engaphezu kwewu-20 esebenza ngezimali, esungula inqubomgomo, ecubungula umnotho, usebenze ezinhlelweni zamazwe nezimboni ezimele ezimakethe zomhlaba.
URatsoma uke waba yiphini likamengameli nesikhulu esibheke izimali eNDB kusukela ngo-2024 kuzekube yilo nyaka. Bekunguye ocubungula ukusebenza kwezimali zamazwe ahlukene, eze nezinhlelo ezizosimamisa iNDB futhi abhale imibiko.
FUNDA NALAPHA: https://www.umbele.co.za/2025/06/30/zikhwele-kunksz-umoahlodi-enew-development-bank/
Ubewumqondisi weNDB esikhungweni sayo sesifunda sase-Afrika kusukela ngo-2018 kuze kube wu-2024 futhi wasungula ihhovisi lokuqala leNDB lase-Afrika ukuze lixhase umsebenzi waleli bhange.
Ngaphambi kokuya eNDB ubenezikhundla ezihlukene eHhovisi lomGcinimafa kusukela ngo-2011 kuya ku-2018, lapho eke waba nawumqondisi-jikelele wenqubomgomo yomnotho futhi eza namasu aletha uguquko emnothweni wezwe.
Ngesikhathi eyiphini lomqondisi-jikelele wenqubomgomo yamazwe omhlaba neyomnotho wesifunda, waqopha umlando ngokuqinisekisa ukuthi kunohlelo lokuxhasa i-African Union exoxisana namabhange ahlukene. Ubewumqondisi ogada ukukhishwa kwezikweletu, egade isikweletu sezwe.
Ube wabawumqondisi weNDB nowe-Trans Caledon Tunnel Authority, oweCorporation for Public Deposit wabamba nesikhundla sesikhulu esiphezulu eThebe Stockbroking.
Une-Masters in Development Economics yase-University of Johannesburg, i-Honours neBCom Economics yase-University of Western Cape nezinye izitifiketi zaseGordon Institute of Business Science nezinye izikhungo zezimali zaphesheya kolwandle.