Zikhwele kwi’mbokodo’eFNB ezobayisikhulu esiphezulu
YINTATHELI YOMBELE
I-FIRSTRAND imemezele izinguquko ebuholini baleli bhange njengoba uNks uLytania Johnson ezophatha izikhundla ezimbili, esokubayisikhulu esiphezulu seFNB nesokubayisikhulu esiphezulu se-Retail and Business Banking (iRBB).
Lezi zinguquko zenzeka ngenxa yokuthi isikhulu esiphezulu esiphethe lezi zikhundla uMnu uHarry Kellan sizothatha umhlalaphansi ekupheleni konyaka.
Esitatimendeni esithunyelwe abezindaba, iFirstRand ithe iRBB izovala isikhala sophiko obelubizwa nge-Retail and Commercial, obelusiza abantu abahola kancane, abahola imali ephakathi nendawo namabhizinisi amancane.
Lolu phiko luzobandawonye ne-Private Banking and Wealth Management, ephethwe wuMnu uSizwe Nxedlana, ozoqhubeka nokubayisikhulu esiphezulu sayo. UNxedlana usebe kulesi sikhundla kusukela ngo-2023.
U-Kellan, osesebenze eFirstRand iminyaka ewu-22, okukhona kuyo eyishumi eyi-chief financial officer, ubeyisikhulu esiphezulu ngo-Ephreli wango-2024 ngemva kokuhamba kukaMnu uJacques Celliers.
Unconywa ngokususa imicikilisho ekusebenzi kwaleli bhange nokuqinisekisa ukuthi lenza umsebenzi ngokushesha futhi liphucula ubuchepheshe.
“Kule minyaka emibili ngiyisikhulu seFNB ngiqinisekise ukuthi isebenza kalula, imikhiqizo yethu ayinamicikilisho futhi ihambisana nobuchwepheshe besimanje,” kusho uKellan.
FUNDA NALAPHA: Izinguquko ezinqala eFirstRand esizoholwa ngowesifazane omnyama. USLINDILE KHANYILE uyabika
Uthe ukushintsha uphiko lwe-Retail nolwe-Commercial yisinyathelo esifanele esizoqinisekisa ukuthi leli bhange linakekela izidingo zamakhasimende alo.
“Ngiyabuthemba ubuholi obusha ngoba ngisebenze nabo iminyaka eminingi. Bunamava azoqinisekisa ukuthi iFNB iyaqhubeka nokuhamba phambili kule mboni.”
UNks uJohnson usesebenze eFNB iminyaka ewu-25, okukhona emithathu eyisikhulu esiphezulu se-Personal Segment.
Uthe miningi imikhiqizo ezoqinisekisa ukuthi iFNB iqhubeka nokuheha amakhasimende, ukwenza izinto ngendlela entsha nokusiza abantu.
“Ngokuhlanganisa uphiko lwe-Retail and Business Banking sizokwazi ukusiza abantu abazisebenzayo, amabhizinisi amancane nemindeni efuna imikhiqizo eyenzelwe yona. Sizosiza abantu namabhizinisi ukuthi abeyingxenye yomnotho wezwe,” kusho yena.
Uphiko i-Enterprise and Public Sector luzongena ngaphansi kwe-Commercial and Corporate Banking, ephethwe wuMnu uMuneer Ismail.
Omunye okhushuliwe esikhundleni wuMnu uGert Kruger, i-chief risk officer, umsebenzi awuqala ngo-2017. Usezoba yi-group chief operating officer.
Isikhala azosishiya sizovalwa nguNks u-Emma Mer, obeyisikhulu se-Retail and Commercial Banking.
Isikhulu esiphezulu seFirstRand uNkk uMary Vilakazi sithe ubuholi obusha buzoqinisekisa ukuthi akunamicikilisho kuleli bhange futhi liyaqhubeka nokukhula.
“I-FNB isesimweni esihle sokukhula njengoba inzuzo engenile ikhule ngo-10% ngaphambi kokukhokha intela. U-Harry wenze umsebenzi omuhle ukubeka ibhizinisi lapho selikhona. Linezinhlelo zokufukula izisebenzi zalo ezikhundleni zokuphatha ezenza ukuthi uma kuvuleka izikhala ebuholini obuphezulu kungaphazamiseki umsebenzi nokukhula. Uqinisekisile nokuthi abaholi bayaziphendulela ngezinqumo abazithathayo,” kusho yena.
Izinguquko zizoqala kule nyanga futhi seziphasisiwe ngabashaya imithetho engamele ukusebenza kwamabhange.