UMasipala waseThekwini usukumele phezulu kunqamuka amanzi
YINTATHELI YOMBELE
ASEPHUMA ngendlela ejwayelekile amanzi ezindaweni ebezikade zingenawo kuMasipala waseThekwini ngemva kokungasebenzi kahle kwe-valve yedamu loMngeni-uThukela Water iNagle.
Loku kuholele ekutheni umasipala uqale uhlelo lokunqamula amanzi ngenhloso yokuwonga ezindaweni ezihlukene ezingaphansi kwawo.
Ngempelasonto imeya yaseThekwini uMnu uCyril Xaba ibibize umhlangano ophuthumayo ukuza nezinhlelo zokuqinisekisa ukuthi amabhizinisi nezakhamuzi aziphelelwa amanzi.
UMngeni-uThukela Water uthe kune-valve obingasebenzi kahle nokuyiyona ebiyena ukuthi kungabibikho amanzi angamalitha awu-150 million ngosuku asuka eNagle Dam aye kwisihlanzi samanzi iDurban Heights esiphakela izindawo eziningi zaseThekwini amanzi ahlanzekile.
Esitatimendeni esithunyelwe abezindaba uMngeni-uThukela Water nomasipala phakathi nesonto, uthe isilungile i-valve futhi iDurban Heights Water Treatment Works isizokwazi ukusabalalisa amanzi ngendlela ejwayelekile.
FUNDA NALAPHA: https://www.umbele.co.za/2025/12/19/umasipala-wasethekwini-uzosebenzisa-ur1-16-billion-ukulungisa-ingqalasinda-yamanzi/
Izindawo ebezithintekil yi-Aloes, i-Avoca, iPhoenix, iMount Moriah, KwaMashu, eNtuzuma, Inanda, uMzinyathi, Etafuleni, iNewlands, i-Effingham, iMountview, iTrenance, i-Oaklands, iBuffelsdraai, iParkgate, Amawoti, iLa Lucia, iGateway, iGlenashley, iBeachway, Umhlanga, iDurban North, iSea Cow Lake, iSpringfield neMount Edgecombe.
Ezinye izindawo ebezithintekile yiNorthdene, iQueensburgh, iMalvern, iChatsworth, iShallcross, iSavannah Park, izingxenye zeNagina, KwaSanti, eMawelewele, eWelbedacht East, Welbedacht West, eLuganda, Inteke, iKlaarwater, iMontford, iRisecliffe, iMoorton, iCrossmoor, iWoodhurst, i-Arena Park, iseMlaza, eNsimbini, eFolweni, eGolokodo, eWestville naseDawncliffe.
E-Pinetown, eSarnia, eWestmead, eNazaretha, eMoseley Park, eCowies Hill, KwaDabeka, eClermont, kuBerkshire Downs nasemafemini eNew Germany nakhona amanzi ebehlupha.
Umasipala uxolisile ngokuphazamiseka okudalekile ngenxa yalesi simo wabonga ukubambisana onako nezakhamuzi nosomabhizinisi akade bephazanyiswe yilesi simo.