Baningi abafuna ukukhangisa kwiDurban Business Fair
YINTATHELI KAMASIPALA
ANGAPHEZU kuka-50 amabhizinisi asebhalisele ukukhangisa embukisweni wesi-28 weDurban Business Fair njengoba kuyisonto lokuqala lokuvulela ukubekisa indawo yokukhangisa.
Loku kukhombisa ukuthi ziningi izinkampani ezifuna ukubayingxenye yalo mbukiso kaMasipala waseThekwini oxhumanisa osomabhizinisi abancane nezimakethe, amathuba nabatshalimali.
Indikimba yalo nyaka ithi “28 Years of Connecting SMMEs to Markets and Opportunities” , okusho ukuthi iminyaka ewu-28 yokuhlanganisa amabhizinisi amancane nezimakethe namathuba. Uzobe useDurban Exhibition Centre kusukela ngomhlaka-30 wango-Ephreli kuya ngomhlaka-2 wangoMeyi.
UMasipala waseThekwini umema bonke osomabhizinisi ukuthi babhalisele ukuzikhangisa kulo mbukiso ngaphambi komhlaka-17 wango-Ephreli.
I-Durban Business Fair iwumbukiso kamasipala ohlose ukuxhasa amabhizinisi amancane, aphakathi nendawo namakhulu, ngokuwanika indawo yokukhangisa imikhiqizo yawo nezinsiza, uwasize ukuthola izimakethe ezintsha nobudlelwano bokuwakhulisa.
Ngaphezulu kombukiso iDurban Business Fair ihambisana nezinkundla zokucobelelana ngolwazi ezigxile ekwenzeni izinto ngendlela entsha ehambisana nobuchwepheshe, ezisiza ukuthola usizo lwezimali nezixhumanisa osomabhizinisi nezimakethe zomhlaba.
FUNDA NALAPHA: https://www.umbele.co.za/2025/03/06/ithuba-lokukhangisa-embukisweni-inorth-regional-durban-business-fair/
Usihlalo wekomiti lokuThuthukisa umNotho nokuHlela kumasipala uMnu uThembo Ntuli uthi lo mbukiso uyaqhubeka nokuthuthukisa amabhizinisi amancane nokuwadalela amathuba.
“Kusukela ngo-1998 angaphezu kuka-40 000 amabhizinisi asebeyingxenye yeDurban Business Fair, bangaphezu kuka-130 000 abantu abathenga izimpahla zezinkampani ezinkulu nezivakashi eziza kuwona, abakhuluma nosomabhizinisi abazikhangisayo.
“Lo mbukiso usize ukudala amathuba emisebenzi angaphezu kuka-21 000 ngenxa yokuthi kutshalwe imali engaphezu kukaR400 000 eminyakeni ewu-28 edlule ukuseka osomabhizinisi abancane ngawo,” kusho yena.
Osomabhizinisi bakhuthazwa ukuthi basheshe babhalise ngoba izikhala zokukhangisa zizoshesha ziphele.
Omunye osethole indawo yokukhangisa wuMnu u-Anele Mabhoza, umsunguli weMabhoza Engineers eseHillcrest.
“Sikuthakasele ukuthi sizobesikhangisa okokuqala kulo mbukizo. Sisheshe sabhalisa ngoba kufanele usheshe uma ufuna ukuba kwiDurban Business Fair. Sifuna ukukhangisa ngezinsiza zethu, ukuhlangana namakhasimende amasha esingawasiza ngezinhlelo zawo nokuthi sifake inkampani yethu kwezinye ezisemgqeni wayo, lapho sinethemba lokuthola imisebenzi yokuba yi-subcontractor. Sesimi ngomumo mbukiso,” kusho yena.
Amafomu okubhalisa atholakala ngokungena kule link: https://tinyurl.com/ye96s948. Atholaka naku-199 ku-Anton Lembede Street (esitezi sesikhombisa), eThekwini nakoSizakala bonke bakamasipala.
Akhona na-online ku-www.durban.gov.za, ucindezele u-Business, ulandele ngelithi SMME Development bese ungena ekhasini leDurban Business Fair.Ungalithola nangokuthumela i-email ku-zamani.shezi@durban.gov.za. Ngemibuzo kungashayelwa ku-031 311 4500.