Kunyuke izinkomba zokubheka amandla eziwu-8 kweziwu-10
YINTATHELI YOMBELE
LELI sonto silivula nge-Absa Purchasing Managers Index (i-PMI) namhlanje, izibalo zomkhandlu wabakhiqizi bezimoto iNaamsa zokudayisa izimoto ezintsha neS&P Global SA PMI elindeleke ngasekupheleni kwesonto.
Izinkomba zesimo somnotho zokudingeka nokudayisa kwezimpahla bekwehlile ngasekupheleni konyaka odlule, nakuba izinkomba ezibheke ikusasa zithembisa, ngakho kuzobakuhle ukubona ukuthi umnotho ubenomfutho ekuqaleni konyaka.
Uma sibheka emhlabeni jikelele, kulindeleke izibalo zokugcina zeS&P Global PMI nocwaningo lwe-ISM yaseMelika. Ne-China izokhipha izibalo ze-PMI zangoJanuwari.
Emihlanganweni yabo ephakathi nesonto iBank of England ne-European Central Bank (i-ECB) kulindeleke ukuthi bangayenyusi imalimboleko ngesonto elizayo. Indlela izinto ebezenzeka ngayo emnothweni wase-United Kingdom, mancane amathuba okuthi imalimboleko yehliswe, nokho kulindeleke ukuthi isitilobho sixegiswe ngokuqhubeka konyaka.
Khonamanjalo, cishe i-ECB ngeke iyinyuse imalimboleko isikhathi eside kulo nyaka, njengoba ne-consumer price index (i-CPI) yangoJanuwari, isikali samanani ezidingo nezimpahla ezingaphezu kweziwu-400 zabathengi, ngeke izishintshe izinto.
Izibalo ezinkulu ezizokhishwa yiMelika yi-nonfarm payrolls, inkomba yanyanga zonke ekala imisebenzi emisha noma elahlekile uma kungabalwa izisebenzi zasemapulazini, emizini yabantu nasezinhlanganweni ezingenzi nzuzo.
Uma kubhekwa eNingizimu Afrika, i-producer price inflation (i-PPI), isikali soshintsho ngesikhathi esithile esitholwa ngabakhiqizi bezwe ngezimpahla zabo, sinyuke ngo- 0.2% uma kuqhathaniswa inyanga nenyanga nango-2.9% uma kuqhathaniswa unyaka nonyaka ngoDisemba.
Izinto eziphose esivivaneni kubeyimikhiqizo yokudla, iziphuzo nogwayi, okubewu-2.9% uma kuqhathaniswa unyaka nonyaka, ngo-0.9 % percentage points, nemboni yefenisha neyokukhiqiza, okubewu-11.9% uma kuqhathaniswa unyaka nonyaka, kwawu-0.5 % percentage points.
Isikali esididiyele esimqoka seBhange lomBuso sinyuke ngo-1.4% uma kuqhathaniswa inyanga nenyanga nango-3.3% uma kuqhathaniswa unyaka nonyaka ngoNovemba, saqhubeka nokunyuka.
Kwizinkomba zokubheka amandla omnotho ezimqoka eziyishumi kunyuke eziyisishiyagalombili. Eziphose esivivaneni kakhulu kubewukwanda kwemali yokukhokha neyokukhangisa izikhala zomsebenzi. Ezintweni ezifadalalise umnotho kubewukunyuka kwemalimboleko nokwehla kokuthenga izimoto ezincane ezintsha.
– Lolu lwazi lucashunwe kwiBureau for Economic Research