Amandla emali aletha ithemba – izingqapheli zomnotho
YINTATHELI YOMBELE
KULOKOZA ithemba ngokwehla kwemalimboleko kule nyanga njengoba izibalo ezintsha zeStatistics South Africa (iStats SA) ziveza ukuthi amandla emali ebewu-3,6% ngoDisemba, esuka ku-3,5% ngoNovemba wangonyaka odlule.
Lezi zibalo eziphume izolo ziveza ukuthi amanani okudla awashintshanga kakhulu njengoba esami ku-4,4%, yize inyama yenkomo iqhubeka nokubiza ngenxa yamatele anganqamuki.
Uma kubhekwa izibalo eziqhathanisa unyaka nonyaka amandla emali ebewu-3,2% ngonyaka odlule, lesi sibalo iStats SA ithi siphansi kakhulu uma ibuka izibalo zeminyaka ewu-21 edlule.
NgoDisemba amanani enkomo kubonakala ukuthi afinyelele ku-29,4%, esuka ku-28,4% ngoNovemba.
Kolunye uhlangothi izibalo zokuthenga izimpahla ezitolo zinyuke zafinyelela ku-3,5% uma kuqhathaniswa unyaka nonyaka ngoNovemba wangonyaka odlule.
Izitolo ezidayisa zonke izinto zinyuse izimpahla ezizidayisayo ngo-2,2%, kwathi ezinye izitolo zazinyusa ngo-8,0% izimpahla ezizidayisayo. Izitolo ezidayisa imithi, izimonyo nokunye kokuzicwala zinyuse izimpahla ezizidayisa ngo-10,1%.
FUNDA NALAPHA: https://www.umbele.co.za/2025/09/18/abathengi-bazothi-nci-nci-bo-kwehla-amanani-okudla/
Izitolo ezidayisa izimpahla zokugqoka, izicathulo nezimpahla zesikhumba zinyuse izimpahla ezizidayisayo ngo-3,9%.
Usomnotho waseStandard Bank uNkk uShireen Darmalingam uthe uma ebheka amandla emali, asewu-3,6%, ubona ukuthi iBhange lomBuso lizoyehlisa imalimboleko kule nyanga.
Uthe abantu bazokwazi ukusala nemali eningi yokuthenga izidingo nezinye izimpahla.
Inhloko ye-Macro-Economic Research eStandard Bank uDkt u-Elna Moolman ithe ilindele ukuthi amandla emali anganyuki ngenxa yokuthi nerandi liloku liqine njalo uma liqhathaniswa nezimali zakwamanye amazwe.
Uthe amanani okudla akawaboni enyuka kakhulu kodwa bazoqaphela isimo njengoba kubenezikhukhula ezifundeni ezihlukene zezwe. Uthe izikhukhula zingabanomphumela esivunweni nasekukhiqizeni kokunye ukudla.
Usomnotho waseFNB uNksz uKoketso Mano uthe njengoba amandla emali ethe ukunyuka kancane ngoDisemba bebekulindele loko nokuthi amanani okudla anganyuki.
Uthe amanani kaphethroli anyuke ngo-1,6%, okusho ukuthi anyuke ngo-0,6% kuphela endaweni ayekuyona ngo-2024.
“Uma unyaka uqhubeka silindele ukuthi uwoyela ongahluziwe ugcwale emakethe, okusho ukuthi amanani kaphethroli ngeke anyuke. Loku kuzobanomphumela omuhle emananini okudla, awezokuthutha nawezimpahla ezithengwa kwamanye amazwe.
“Konke loku kufanele kugqugquzele ikomiti elithatha izinqumo ngemalimboleko eBhange lomBuso ukuthi lingayinyusi uma selenza isinqumo kule nyanga. I-Stats SA izokhipha ezinye izibalo zamandla emali ngoFebhuwari 18,” kuphetha uNksz uMano.