Umfuyi omnyama uyibambe ishisa emkhakheni wokufuya izintshe
WUTHOBILE ZWANE
UMFUYI wezintshe waseNorth West wadayisa imoto yakhe ukuze akwazi ukuthenga ipulazi. Inhloso yakhe kwakuwukuhlanganisa uthando lwakhe lwebhizinisi elingajwayelekile kubantu abamnyama.
Nakuba kwakulukhuni satshe ukungena embonini yokufuya izintshe ngenxa yokuthi kukhonya abelungu, uMnu uKabelo Lekalakala waseBrits, oneminyaka ewu-36, wasungula iPitso Ostrich Farm ngo-2019.
IPitso Ostrich Farm isidayisa inyama yentshe ezitolo ezinkulu, okubalwa kuzona uWoolworths, uCheckers, uBoxer namabhusha endawo.
ULekalakala uthi emva kokuphothula uMatikuletsheni, wathola iziqu i-Bachelor of Business Administration e-University of South Africa. Emva kwaloko waba yi-enterprise development practitioner, e-Oudtshoorn, eNtshonalanga Kapa, ethathwa njengekomkhulu lezintshe.
Emva kokufunda kabanzi ngezintshe kusukela ekuzikhuliseni, ukuzihlinza, ukubona imikhiqizo eyenziwa ngezimpaphe zazo, amaqanda nesikhumba wezwa ngelinye ikhasimende ngeminye imikhiqizo emihle eyenziwa ngesikhumba sentshe. Leyo nkulumo yamthathisa isinqumo sokuqala ibhizinisi. Wathenga amachwane ezintshe awu-17 kumqashi wakhe wagoduka nawo.
Wehlelwa wumshophi zisuka amadaka. “Ngafika ekhaya namachwane ezintshe awu-17 ngawabeka egaraji. Inselelo yokuqala kwabawukuthi awanayo indawo yokuhlala nokwaphoqa ukuthi nginwebe ihhoko lezinkukhu ukuze ahlale kulo. Inselelo yesibili kwabawukugula kwamachwane, amaningi afa ngenxa yokuthi ayephethwe yisifo esihlasela amachwane futhi awanayo indawo efanele yokuhlala,” kusho yena.
Lesi sigameko samnika isifundo sokuthi afune ipulazi lakhe. Ngenxa yokuswela imali eyanele, kwadingeka ukuthi adayise imoto ukuze ibhange limboleke imali. Wathenga ipulazi elingamahektha amahlanu. Uthi wafunda nokulalela umeluleki wemfuyo ogxile embonini yezintshe.
Uthi yize esesebenze kanzima kodwa kuseyinkinga ukuthola usizo emNyangweni wezoLimo. “Leli pulazi lithatha u-60% womholo wami, nginezindleko zikagesi, ezokudla, ezemithi nokunye. Amanani ezinsiza zasepulazini nawo ayazwela ephaketheni ngoba ucingo olubiyile ukuze sivikele izintshe kojakalase olukagesi,” kusho yena.
Nakuba kunzima kodwa iPitso Ostrich Farm isiqashe izisebenzi ezine ezisebenza ngokugcwele kanti idayisa kakhulu inyama ngoba amaqanda awakayenzi inzuzo.
Ukhala ngokuthi imboni yokufuya izintshe ayikaguquki, njengoba kusagcwele abelungu.
Iseluleko sakhe kwabafuna ukungena embonini yokufuya wukuthi baqale kancane bese befunda ngendlela.
“Ukufuya izintshe kudinga ukubekezela. Yakha ubudlelwano, lungiselela izindleko eziqhamuka esikhanleni futhi ungesabi ukulwela indawo yakho. Funda ngebhizinisi lakho futhi uzibambele. Tshala imali kwingqalasizinda futhi uxhumane kahle nazo zonke izinhlaka osebenza nazo,” kusho yena.
Facebook: PITSO Ostrich Farm