Izikhukhula zamnika umqondo wokwenza amalahle avikela imvelo
WUTHOBILE ZWANE
IZIKHUKHULA ezahlasela KwaZulu-Natali ngo-2022 zanika intokazi yaseThekwini umqondo wokuqala ibhizinisi lokwenza amalahle ngezihlahla ezaziwele emigwaqweni nasemizini yabantu.
UNksz uBusisiwe Mbanda, odabuka eMaphephetheni kodwa osezinze eMatikwe, eNanda, wasungula iVolcanic Explosion, ayibhalise ngokusemthethweni ngoMeyi ngonyaka odlule.
Le ntokazi eneminyaka ewu-32 ithi: “Nginothando lokusungula amabhizinisi enza umehluko emphakathini wami, ikakhulu ngokugaya kabusha imfucuza nokwenza ugesi ohlanzekile nezolimo.”
Uthi esikhundleni sokuziyeka izihlahla, wabona ithuba lokuphinda azisebenzise zibengamalahle angasiza umphakathi namabhizinisi. Uthe lowo mzuzu wakhombisa ukubaluleka kokuguqula izinselelo zibeyizixazululo.
Yize ayengenazo iziqu nolwazi lokukhiqiza amalahle kodwa uthe wasizwa wucwaningo lwakhe, efunda kancane kancane, nokuzama waze wagcina ekwazile ukukhiqiza amalahle asezingeni eliphezulu.
Uthi akubanga wuhambo olulula kodwa ukuzimisela kwakhe kwamenza waphokophela.
U-4kg wamalahle ubiza uR70 kanti intengo yokugawula izihlahla iyangobukhulu besihlahla nobunzima bakhona noma ingozi yendawo.
Uthe eVolcanic Explosion kunezinto abaziqhayisa ngazo, okwenza behluke ezimbangini zabo: “Sisebenza ngokukhethekile ukukhiqiza amalahle ngezihlahla. Amalahle ethu awayilimazi imvelo futhi asetshenziswa kakhulu emabhizinisini endawo, engingabala kuwo oshisanyama nakwezinye izimboni. Sihlinzeka ngezinsiza zokugawula izihlahla nokugaya kabusha ukwenza isiqiniseko sokuthi izinkuni ezilahlwayo zisetshenziswa kabusha esikhundleni sokulimaza imvelo,” kusho uNksz uMbanda.
Exoxa ngezinselelo abhekana nazo uthi wukungatholi usizo lwezimali nolwemishini yokwenza umsebenzi lula, udinga nezinsiza zokupakisa ezizofaka uphawu. Udinga imakethe azodayisa kuyo futhi nezindleko zokuthutha umkhiqizo ziseyinselelo.
Ngaphandle kwalokhu, uhlale ezibophezele ekukhuliseni ibhizinisi lakhe nokudala izixazululo ezizosimamisa umphakathi wakhe.
“Ibhizinisi lami ligqamile ngoba sigaya kabusha izihlahla eziwile zibengamalahle alungele imvelo, sinciphisa ukugawula amahlathi, sibe sisiza amabhizinisi endawo oshisanyama futhi sigaya amalahle ngomshini wokucindezela, okwenza ukukhiqiza kwethu kubengokusha futhi kungabizi,” kusho yena.
UNksz uMbanda uthi into ayijabulela kakhulu ngokuba umnikazi webhizinisi inkululeko yokudala izixazululo, ukubanomphumela omuhle emphakathini nokubona ukusebenza kwakhe kanzima kuphenduka okuthile okusiza abantu nokudala amathuba.
Unezisebenzi ezinhlanu okwamanje. Uthi uma esethole izinkontileka ezinkulu nosizo lwezimali uhlela ukwandisa nokudala amathuba emisebenzi engeziwe emphakathini.
EluIeka abanye osomabhizinisi, uthi kufanele babenesineke, baphikelele futhi bazimisele ukufunda ngokwenza amaphutha.
“Cwaninga imakethe yakho, sungula lapho ungakwazi khona futhi ungalokothi wesabe ukuqala kancane. Ukungaguquguquki nokuzimisela kuzoholela empumelelweni,” kucebisa uNksz uMbanda. Muzwe echaza:
Phakathi kwezifiso zakhe ngeVolcanic Explosion kubalwa ukubanehlathi layo ukuze ivikele izinto eziluhlaza, ukutshala imali emishinini ukwandisa ukukhiqiza nokusabalalela ezimakethe zasekhaya nezaphesheya. Uthi uhlose nokwakha amanye amathuba emisebenzi emphakathini njengoba ibhizinisi likhula.