Sekuqalile ukuqagela ngozovala isikhala somphathi weStandard Bank
ISIQALILE imvunge yokuthi ngubani ongase athathe indawo yesikhulu esiphezulu sebhange elikhulu e-Afrika iStandard Bank Group emva kokuthi ibhodi imemezele ukuthi uMnu uSim Tshabalala uzothatha umhlalaphansi ngo-2027.
Le nsizwa edabuka KwaHlabisa, enyakatho yaKwaZulu-Natali, yafika yashintsha izinto eStandard Bank ngo-2000 futhi iloku ikhuphuka ezikhundleni yagcina isiliphethe.
Ibhodi imemezele ukuthi yize umhlaphansi wabanye abasebenzi usululiwe usuka eminyakeni ewu-60 uya kwewu-63 kodwa loku ngeke kushintshe kuTshabalala nakwi-Group chief finance and value management officer uMnu u-Arno Daehnke.
Bobabili bazobebeneminyaka ewu-60 ngo-2027, ngakho bazothatha umhlalaphansi.
FUNDA NALAPHA: https://www.umbele.co.za/2025/07/03/izikhulu-zestandard-bank-zilulelwe-isikhathi-sempesheni/
Usihlalo webhodi yeStandard Bank Group uNkk uNonkululeko Nyembezi uthe ukululwa kwesikhathi somhlalaphansi kuhambisana nokwenzeka emhlabeni jikelele.
“Sinazo izinhlelo ezicacile zobuholi futhi uSim no-Arno basebenze ngokuzikhandla, beza namaqhinga akhulise iStandard Bank. Ukumemezela kwethu umhlalaphansi wabo manje kusho ukuthi bakhona vele abaholi abalungiselelwa ukuthi bahole ngomuso,” kusho yena.
Ngo-2024 iStandard Bank yathola indondo i-Forbes World’s Best Employers. Kulindeleke ukuthi uma kuphela u-2027 iStandard Bank ibe isinobuholi obusha.
Ukuqagela sekuqalile njengoba amanye amabhange eseziqokile izikhulu zawo eziphezulu. Kuzokhumbuleka ukuthi ngonyaka odlule iFirst Rand, ephethe iFNB, iqoke uNkk uMary Vilakazi akuthi abeyisikhulu esiphezulu, iNedbank yaqoka uMnu uJason Quinn.
Kulo nyaka uMnu uKenny Fihla obekucatshangwa ukuthi angangena esikhundleni sikaTshabalala uthathe umsebenzi wesikhulu esiphezulu e-Absa. I-Capitec imemezela uMnu uGraham Lee ukuthi abeyisikhulu sayo esiphezulu.
Embikweni we-Moneyweb uTshabalala, owafika eStandard Bank ngo-2000, ukhule ngokushesha njengoba kwathi emva kweminyaka eyisithupha efikile wabayisikhulu esiphezulu se-Personal and Business Banking eNingizimu Afrika. Emva kweminyaka emibili ekulesi sikhundla waqokelwa kwesokuphatha iStandard Bank eNingizimu Afrika.
Ngo-2009 owayeyisikhulu esiphezulu ngaleso sikhath, uMnu uJacko Maree waqoka amaphini amathathu okwakunguTshabalala, noMnuz uBen Kruger noPeter Wharton-Hood. U-Maree wayesebe yisikhulu esiphezulu iminyaka eyishumi.
Ngemva kokuthatha umhlalaphansi ngo-2013, kwaqokwa izikhulu eziphezulu ezimbili uTshabalala noKruger. U-Kruger wathatha umhlalaphansi ngo-2018, kwaqokwa uTshabalala.
Izingqapheli zithi loku kukhombisa ukuthi uMaree nethimba lakhe babeneqhinga lokukhiqiza abaholi bangomuso. Kubaholi abakhona manje kubalwa oMnu uDavid Hodnett, izingqapheli ezingamboni eqokwa ukubayisikhulu esiphezulu, noBill Blackie, isikhulu se-Business and Commercial Banking.
Amehlo athe njo kuMnu uLungisa Fuzile, yize emncane ngonyaka kuTshabalala, noNkk uFuneka Montjane, isikhulu se-Personal and Private Banking, ozakhele udumo ngokuletha uguquko oluhe kulolu phiko.
Abanye ababalwa kulo mbiko woMnu uLuvuyo Masinda, isikhulu se-Corporate and Investment Banking noNkk uMargaret Nienaber, i-Group chief operating officer.
Kulindeleke ukuthi kucace ngonyaka ozayo ukuthi wubani ngempela ozongena kulesi sikhundla noma kubakhona okhushulelwa esikhundleni sephini.