I-reSURGEnce yisidikadika sethuba lokuhlomula kosomabhizinisi
YINTATHELI KAMASIPALA
ZIVULIWE izicelo zokukhangisa embukisweni wamabhizinisi i-reSURGEnce ozobaseThekwini kusukela ngomhlaka-20 kuya kumhlaka-24 wangoSepthemba seNkosi Albert Luthui International Convention Centre, eThekwini, KwaZulu-Natali.
Indikimba yalo nyaka ithi “A Thicker Slice of the Economic Pie,” okusho ukuthi ucezu olukhudlwana lomnotho, ihambisana nempumelelo yangonyaka odlule futhi izoqinisekisa ukuthi abayihambelayo bazokwaziwa ngabantu abaningi ukuze bangene basimame emnothweni.
Kuzobe kukhona abatshalimali nezikhulu zohwebo. Izimboni ezikhuthazwa ukuthi zizokhangisa ngeyefenisha, izicathulo, eyezinsimbi zezimoto, imishini, izinsimbi, ubuciko nokunye.
Izicelo zokukhangisa zivala ngoLwesihlanu lomhlaka-29 wango-Agasti. Osomabhizinisi, abasunguli bezinto ezintsha, izinkampani ezinkulu, ezinemikhiqizo efanele ukungena emakethe bakhuthazwa ukuthi bakhangise kubatshalimali nabantu bakwamanye amazwe.
Abafisa ukukhangisa bangangena kwi-link ethi: https://tinyurl.com/bdhtd7y7 noma bathole amafomu emahhovisi eBusiness Support ase-Embassy Building, e-7th floor, ku-199 Anton Lembede Street. Ayatholakala nakonogada amafomu noma ngokuthumela i-email ku-zamani.shezi@durban.gov.za
FUNDA NALAPHA: https://www.umbele.co.za/2024/06/24/abasethekwini-bashela-abatshalimali-basemelika/
Umbukiso uyoqala ngomhlaka-22 kuya ku-23 kuSepthemba, uzosiza abantu ukungena ezimakethe ezintsha, ukuzakhela igama, amathuba okusimamisa amabhizinisi nokuzobasiza ukuthola amathuba okuthumela izimpahla kwamanye amazwe.
Uhlelo lwakulo nyaka luzoba nengqungquthela yezinsuku ezimbili ezoqhubeka kanyekanye nombukiso nezinkulumo zohwebo, ezokutshala imali nezosomabhizinisi abasungule izinto. Kuzobanenkulumo eholwa ngosomabhizinisi nabatshalimali base-Afrika neyabatshalimali bakwamanye amazwe ezoba ngomhlaka-21 wangoSephtemba.
Lezi zinkulumo zizohambisana namasu okuxhumana, awokucijwa ngamakhono nawokuxoxa nabatshalimali ngqo.
Ngonyaka odlule i-reSURGEnce yangenisa uR203 million emnothweni wezwe, yafaka uR82m owangena ngqo emabhizinisini ayeyingxenye yalo mbukiso.
Kulo nyaka kuzoza abantu abangaphezu kuka-150 baseMelika namanye amazwe ase-Afrika, okuzosiza ukuqinisa ubudlelwano bohwebo.
I-reSURGEnce kuzobe kuwunyaka wesibili yenziwa kanti iwuhlelo olubalulekile lukaMasipala waseThekwini ubambisene nowaseNew York, eMelika. Ihlose ukushintsha indlela i-Afrika ebukwa ngayo kwezomnotho.
Mayelana nemibuzo, kungashayelwa u-031 311 4500 noma kuthunyelwe i-email ku: nondumiso.mthetmbu@durban.gov.za noma ku-Zamani.Shezi@durban.gov.za. Ngeminye imininingwane ungavakashela u-www.reSURGEnceConference.com noma ulandele u-@reSURGEnceConference kuzo zonke izinkundla zokuxhumana.