Amaciko azokhangisa ubuciko bawo kwiFNB Art Joburg
YINTATHELI YOMBELE
AZOTHOLA ithuba lokuzikhangisa nokwenza imali amaciko aseNingizimu Afrika njengoba ubuya okwesi-18 umbukiso omkhulu wobuciko e-Afrika, iFNB Art Joburg.
Lo mbukiso uzoba seSandton Convention Centre eSandton, eGoli, eGauteng, kusukela ngoLwesihlanu lwangomhlaka-5 wangoSepthemba kuze kubeyiSonto mhlaka-7 kuSepthemba. Unyusa izinga leGoli kwezobuciko uma liqhathaniswa namanye amazwe avelele emhlabeni.
I-chief marketing officer yaseFNB uNks uFaye Mfikwe ithe: “Ukubambisana kweFNB ne-Art Joburg kutshengisa ukukholelwa kwethu ekuvezeni ithalente lase-Afrika nokuzibophezela ekusekeni ukukhula komnotho wezwe. Ngokwesu lethu lokuxhasa imiphakathi esisebenzisana nayo i-Grassroots to Greatness, asigcini nje ngokubayibhange kodwa sifukula imiphakathi ngezindlela ezihlukene. Ngaloku kubambisana, senza kubelula ukufinyelela ezimakethe zomhlaba, sinike amaciko ase-Afrika ithuba lokukhangisa ngomsebenzi wawo emhlabeni jikelele.”
Kusukela yasungulwa iFNB Art Joburg ihlanganise abaculi, amagaraji, abantu abaqoqa ubuciko, ababhali, ongoti nabathandi bobuciko. Uhlelo lwalo nyaka lunohlu lobuciko obuhlukene obuzobe bukhangiswa, okubalwa ne-Open City (ezoqala mhlaka-28 Agasti iphele ngomhlaka ka-11 Septhemba).
Umqondisi weFNB Art Joburg uMnu uMandla Sibeko uthi lo mbukiso wobuciko kade wabakhona futhi awuwona nje umcimbi kodwa uyinkundla yokusimamisa umnotho wezobuciko ngokuthuthukisa, ukukhuthaza nokuseka ubuciko besimanje base-Afrika nohlelo lwayo lwendalo.
“Lo mbukiso waqalwa ngoba kunesidingo sokwakha ingqalasizinda esimeme, ephethwe ngabase-Afrika, ebeka eqhulwini amazwi nemibono yamaciko, amagaraji nezikhungo zakuleli zwe nabangaphandle,” kusho yenu.
FUNDA NALAPHA: https://www.umbele.co.za/2024/05/16/ubuciko-nezokuvakasha-kungalekelelana-amaciko/
USibeko uthi iFNB Art Joburg isebenza ngobuciko obubukwayo, obamasiko namabhizinisi anobuciko.
“Sisebenzisana namagalari, amaciko, abaqoqi bobuciko, ababhali nama-designer ukuze sisekele ububanzi bochungechunge lwenani lobuciko obubonakalayo. Ukuzibophezela kwethu kudlulela ngale kombukiso ukuze kubandakanye imfundo, ukushicilela, ukucija nokutshalwa kwezimali emisebenzini yobuciko isikhathi eside,” kusho yena.
Uthi njengabaxhasi nozakwabo abasungula lo mbukiso, ukuseka okuqhubekayo kweFNB kwabavumela ukuthi bagxile ekukhuleni ngokomsebenzi, ukusungula izinto ezintsha ezizobanomphumela omuhle.
“Ngalobu budlelwano, siyakwazi ukukhulisa imibono yabantu base-Afrika, sikhulise ukusebenza kahle kwemboni yobuciko futhi senze kube lula ukufinyelela kuma-collector amasha, amaciko asemancane, namagalari asafufusa. Ukusekwa yiFNB kubuye kusivumele ukuthi sitshale imali kwingqalasizinda edingekayo ukuze sithuthukise umnotho oguqukayo nokuncintisana emhlabeni jikelele,” kusho uSibeko.
Uqhube wathi ngaphambi kokusekwa okusemthethweni nokungashintshi, ubuciko bubhekane nezinselelo mayelana nokusimama, ukufinyelela emalini nezinkundla ezithile zokubonakala. Amaciko amaningi namagaraji abengenazinsiza zokubamba iqhaza ezingxoxweni zomhlaba noma ezimakethe. Njengobulungiswa, kwadingeka futhi sibheke ubunzima bokwakha isikhungo esithembekile samasiko ePan-African emakethe eyayidelelekile.
Eluleka abanye osomabhizinisi uthe isakhiwo sibalulekile. Isiko liyimali enamandla kodwa ngaphandle kwezinhlelo, izinhlelo ezicacile ngentengo, ukuxhumana okucacile, nokuhlela isikhathi eside kunzima ukukhula.
Uthe kufanele bafake imali emphakathini basebenzisane, babelane ngolwazi. Okubaluleke kakhulu, uthi yazi ukubaluleka kwakho futhi ungesabi ukuziveza ezingxoxweni ezibanzi zezomnotho nezamasiko.