Inono lenza impilo yabantu lula ngokuqhakazisa amagceke
WUTHOBILE ZWANE
INSIZWA yaseThekwini ibonga abazali bayo ngokuyifundisa ukubaluleka kokuhlala endaweni ehlanzekile.
Ikhumbula indlela eyakhula ngayo, ithi unina, ongasekho, wayewumuntu othanda ukulungisa ingadi. Ithi nayo yagcina isithanda ukuhlela igceke nokulihlobisa.
Le nsizwa yaseMlaza, eningizimu yaseThekwini, ezalwa namantombazane ithi yakhula kubo ungekho umsebenzi wamadoda noma wabantu besifazane, wonke umuntu kwakufanele akwazi ukuhlanza indlu, ukupheka, ukuwasha nayo yonke imisebenzi yasekhaya.
UMnu uMthokozisi Shabangu, oneminyaka ewu-39, uwumsunguli weSgejane Waste Management, ibhizinisi elibulala izinambuzane, eligawula izihlahla, elilungisa umhlaba, nengadi, liqoqe imfucuza, linakekela inhlabathi nokukhucululisisa izindawo. Isanda kuqala uhlelo lokuqoqa imfucuza bese iyivuselela
FUNDA NALAPHA: https://www.umbele.co.za/2021/10/28/ukhuthaza-intsha-ukuthi-ibheke-imboni-yemfucuza-ngamanye-amehlo-utebogo-mokwena-uyabika/
ISgejane, eqanjwe ngesithakazelo, yasungulwa ngo-2021. “Ngazitshela ukuthi abantu bayakuthanda ukuhlanzeka kodwa abanaso isikhathi sokwenza umsebenzi, ngakho ngeza nesiqubulo esithi ‘Let’s handle it’, okusho ukuthi yekela thina sikwenzele,” kusho yena.
UShabangu kwezinye izinselelo ababhekana nazo ebhizinisini wukuthi abantu abaningi abawuqondi kahle umsebenzi wakhe, ngakho uma sekufanele bakhokhe babamadolonzima.
“Angenze isibonelo nje. Uma kugencwa izihlahlakubhekwa izinto eziningi ezifana nokuphakama nokuphepha okunomphumela ekwenzeni umsebenzi. Amakhasimende amnyama awalihloniphi ibhizinisi lethu; njengezinye izizwe. Amanye aye angafuni ukukhokha idiphozithi, amanye akhokha imali engaphelele, amanye akhokhe sekudlule isikhathi. Loku kuba nomphumela omubi ebhizinisini,” kusho yena.
Useqashe izisebenzi ezintathu eziqashwe ngokugcwele kanti uqashe eziyitoho uma kunesidingo.
ISgejane iziqhayisa ngezisebenzi zesilisa nezesifazane ezigcina isikhathi, ezizikhandlayo, okwenza zigqame. Uthi bayaqinisekisa ukuthi amakhasimende abo abakhona uma besebenza ukuze ahlole ngesikhathi besebenza noma sebeqile.
UShabangu uthi into ayithanda ngokubanebhizinisi wukuzimela nokudala amathuba omsebenzi.
“Ukufundisa abantu umsebenzi ngesipiloyini enginaso nezinto esengidlule kuzo (ngiyakuthanda). Ngithanda nokubafundisa indlela yokusebenza nokukhuthaza abanye abantu abasha ukuthi awudingi ukuqashwa ukuze ukwazi ukuqhubekela phambili empilweni kodwa uma ungaziqalela into yakho ngoba uma zimisele kuyenzeka,” kusho yena.
Uthi bagxile kakhulu kumakhasimende asezindaweni zokuhlala abantu nasezimbonini ezizimele. Amakhasimende akhe kuvamise ukubangabantu abanezihlahla ezidinga ukugencwa noma ukuphundlwa, kwesinye isikhathi basuke bedinga ukwakha noma befuna igceke libukeke kahle.
Ululeka abafisa ukungena ebhizinisini ukuthi bathande into abayenzayo ngoba ngeke babone izithelo ezinhle zento abayenzayo uma bengenalo uthando.
“Zamani izinto ezintsha. Sihlale sibona abantu abanemali bethi baqala amabhizinisi athile ahlukile awangahamba kahle, amanye ahamba kahle. Ngikholwa wukuthi uma ubona isikhala sento engakufakela imali noma engashintsha impilo yakho yizame kancane, kancane, emva kwaloko uzokwazi ukukhula kuyona. Akukho okuncane uma nje kungena imali,” kusho yena.
UShabanga ufisa ukubona iSgejane idlondlobala, iqashe abantu abaningi endaweni, akwazi ukuthola izinsizakusebenza ezifanele ezinjengamaloli uma enza umsebenzi omkhulu.
“Ngifisa likhule ibhizinisi, licije abantu ngokuthi baqale amabhizinisi abo. Sifisa ukuthola nezinkontilela ezinkulu zeminyaka eminingi,” kusho yena.
Facebook: Mthokozisi Scucu Shabangu
_scucu