UMasipala weTheku wethule inkundla iKhuluma Nathi

UMASIPALA waseThekwini unxusa izakhamuzi ukuthi zibhalise kwi-chatbot entsha ka-Whatsapp ebizwa ngeKhuluma Nathi/Let’s Engage, ukuze zihlanganyele kalula oHlelweni lweNtuthuko eDidiyelwe lukamasipala. 

UMkhandlu ugunyaze ukuthi i-Integrated Development Plan (i-IDP) ehlongozwayo yethulwe emphakathini ukuze idingidwe ngomhla ka-31 wangoMashi. Lo mqulu wethulwe ngesikhathi esisodwa nesabelomali esihlongozwayo ukuze umphakathi uphawule. 

Inkundla iKhuluma Nathi/ Let’s Engage iqukethe ulwazi nge-IDP, imininingwane ngezinhlelo ezihlukene,nemiqulu equkethe ulwazi olwengeziwe. Le nkundla ivumela umphakathi ukuthi ukhethe uhlelo ofisa ukuphawula ngalo nolimi ofisa ukuphawula ngalo. Le nkundla inesiNgisi nesiZulu, okuqinisekisa ukuthi zonke izakhamuzi zaseThekwini zihlinzekelwe.

I-chief strategy officer uMnu uBongumusa Zondo uthe le chatbot iyingxenye yenhloso yohulumeni bendawo yokuthuthukisa ukuphatha ngendlela efaka zonke izinhlaka zomphakathi ngokusebenzisa ubuchwepheshe besimanje. 

“Lolu hlelo luqale ngemva kwe-COVID-19. Ihhovisi le-Strategic Management, ngokwesekwa yiHuman Sciences Research Council, lisungule le-WhatsApp chatbot ukuthuthukisa indlela yokuxhumana nomphakathi nge-IDP. Ihambisana nohlelo (lomNyango weSayensi nokuSungula iziNto eziNtsha) e-Participation Policy Modeling Platform for South Africa,” kusho yena. 

Ungabhalisa ku-060 225 9959 ukuthole ulwazi futhi uphawule nge-IDP. Le nkundla ngeyokuxoxisana nge-IDP kuphela, hhayi ezinye izikhalo nemibuzo. Umphakathi uyaqinisekiswa ukuthi ulwazi lomuntu siqu luzovikelwa.