Isikhungo semfucuza saseHammarsdale sisimamisa umnotho 

YINTATHELI YOMBELE 

UBUCHWEPHESHE bebuhamba phambili emcimbini wokuthula indlu ebiza kancane eyakhiwe ngemfucuza enezinto ezigaywe kabusha okuhlanganisa ingilazi, imfucuza yezinto zokwakha. Ingxenye ewu-70% wendlu yakhiwe ngemfucuza ehlanganiswe kabusha.

Lo mcimbi ubuwenziwe wuphiko lukaMasipala waseThekwini lwamaBhizinisi nokuHlela lubambisene nesikhungo socwaningo iCouncil for Scientific and Industrial Research, i-Use-it neKey Bricks. 

Lesi sakhiwo esisha sithulwe ngokusemthethweni emNyangweni weSayensi, ubuChwepheshe neZinto eziNtsha emcimbini obuseHammarsdale Waste Beneficiation Centre, entshonalanga yaseThekwini.

Izitini ezintsha zinhle ngenxa yokuthi kusetshenziswa izinsiza ezimbalwa zemvelo, okubalwa isihlabathi sasemfuleni, amatshe namanzi. Izitini ziyahlangana uma kwakhiwa, okusho ukuthi zidinga udaka oluncane nosimende ukuhlanganiswa kahle. 

UDkt uMmboneni Muofhe, iphini lomqondisi-jikelele emNyangweni weSayensi nobuChwepheshe, ubekhona emcimbini wokuvula isakhiwo esingabizi iHammarsdale Waste Beneficiation Centre.

Lesi sikhungo esiqoqa imfucuza sihlose ukugqugquzela ukwenza izinto ngendlela entsha engayiceli phansi imvelo ngokusungula amafemu amancane asebenza ngokuzimela ngaphandle kwendawo. I-Use-it iyaqhubeka nokusiza ukunciphisa imfucuza ezindaweni zokulahla udoti.

Phakathi kwezinto ezisetshenziswe ukwenza izitini kukhona ingilazi ewu-22%, u-44% wemfucuza yokwakha, u-22% wesihlabathi, u-11 % kasimende no-1% wamanzi. Lezi zitini zingasetshenziswa embonini yokwakha nezindlu.

Izitini zingasetshenziswa kabusha futhi uma kwakhiwa kungahlukaniseka kalula ngenxa yalesi sakhiwo.

UDkt uMuofhe uthe ukusebenzisana kwabo kulolu hlelo kuzokhuthaza ukwakha, kusimamise amabhizinisi amancane ngesikhathi kubhekwa izidingo ezifana nezindlu ezinabantu abahola kancane. 

Lesi sikhungo sigxile futhi emisebenzini nokuthuthukisa amakhono ngokubambisana neziphathimandla zale mboni.