Uma imali isetshenziselwa ukuxazulula inkinga kufanele kube yisisombululo esibambekayo, kuloba uBusi Mavuso

UKUNTULEKA kwemisebenzi yinkinga okufanele siyixazulule ngokushesha kanti indlela yokwenza loko wukukhulisa umnotho. Izinguquko ezinqala zikhulisa umnotho, zinciphisa izindleko zokubanebhizinisi futhi zenza izinkampani zitshale imali ukukhulisa umsebenzi.

Uma izinkampani zitshala imali ukukhulisa umsebenzi, ziqasha abantu. Yiyona ndlela efanele leyo yokusungula imisebenzi ngoba lezo zisebenzi zengeza emkhiqizweni womnotho, okwenza izinkampani zenze inzuzo, okwenza kwande imali etshalwayo futhi kukhulise umnotho.

Kulula ukucabanga ukuthi kungcono ukuthatha izinsizakusebenza ezincane zikahulumeni ukuvikela imisebenzi yabantu. Kwesinye isikhathi yinto ezwakalayo leyo uma kukhona ezinye izinto okungenzeka ziphazamise ukusebenza kwaleyo nkampani nokuvikela kwayo imisebenzi. I-COVID-19 iyisibonelo esihle saloku ngesikhathi izwe livaliwe okwaphoqa izinkampani ukuthi zivale, nokwenza ezinye izisebenzi zaphelelwa wumsebenzi kodwa kuthe uma selivuliwe izwe, leyo misebenzi yaqhubeka. 

Kufanele sikugweme ukusebenzisa imali kahulumeni ukwenza imisebenzi engeke isebenze kahle ngoba akusizi ngalutho. Uma inkampani ingayenzi inzuzo, ayisebenzi kahle. Uma uhulumeni ungenelela ukulixhasa lelo bhizinisi, kufanele kubenohlelo olucacile lokuthi uzobuye uhoxe kanjani. Lolu sizo lungaba yizindlela ezihlukene njengokutshala imali ngqo ezinkampanini, ukuxegisa intela nokuthula intela yokuvikela izinkampani zezwe. 

Mhlawumbe kungaba wumqondo ophusile ukuthatha lezi zinyathelo, inqobo nje uma kuzothi uma sekuphelile, umphakathi ube ungcono. Kodwa uma kungenjalo, sichitha imali nje. Loko kuphazamisa ukukhula komnotho nokwakha imisebenzi, izinto okufanele ngabe siyaziphokophela.  

Ngizisho lezi zinto ngenxa yemizamo eyinqwaba kahulumeni yokuxhasa i-Arcelor Mittal South Africa nesiphakamiso sokusungula isikhwama esiwuR100 billion esizokwengamela ukuletha ushintsho ezinkampanini. 

Uma sibheka udaba lwe-Arcelor Mittal, isiphakamiso esisanda kwenziwa sithi akuthathwe esikhwameni esiyingxenye kapoyinandi i-Temporary Employer/Employee Relief Scheme (i-TERS), isikhwama esasungulelwa ukuseka izisebenzi ngesikhathi izwe livaliwe ngenxa yeCOVID-19. 

FUNDA NALAPHA: https://www.umbele.co.za/2025/01/07/ayisukunyelwe-eyefemu-yokusansimbi-ungqongqoshe/

I-TERS izoxhasa izisebenzi eziwu-2 982 unyaka wonke kanti lokhu kuzodla uR417 million. Loku bekuzobe kulungile ukube kunento ecacile yokuthi ekugcineni yini ezokwenziwa ukuze umsebenzi uqhubeke kodwa akubonakali kanjalo. 

I-Arcelor Mittal  isinqume ukuyivala ifemu emva kokulahlekelwa wuR1.1bn ngonyaka odlule. Le nkampani isivele isizwe yi-Industrial Development Corporation ukuqhuba umsebenzi. Umbandela wokusizwa nge-TERS uthi kufanele le nkampani iqhamuke nezindlela zokushintsha izinto kodwa ngesonto elidlule le nkampani ibiqhubeka nezinhlelo zayo zokuvala ifemu. 

Lama femu e-Arcelor Mittal akhiqiza okusansimbi okusetshenziswa kojantshi, ezimayini, kwezolimo nezinye izimboni. Uma bezingenzeka izinguquko ezinqala ezidingekayo ukukhulisa umnotho, cishe umkhiqizo wale nkampani  ubungafunwa kakhulu. 

Isibonelo nje wukuthi uma kungaguqulwa imboni yokuthutha izimpahla, loku kungaheha abatshalimali abakhulu abangafaka imali kwingqalasizinda yezitimela ngokusebenzisana kukahulumeni nemboni ezimele. Izinkampani ziyawa zonke izinsuku ngesikhathi zilinde izinguquko ezinqala lezi ezidingekayo ukukhulisa umnotho. I-Arcelor Mittal yiyo esematheni kodwa baningi nabanye. Uma sizosebenzisa imali yomphakathi, asiyisebenzisele ukuguqula izinto ezizokhulisa umnotho. 

UmNyango wokuHweba, iziMboni nokuNcintisana usushicilele isiphakamiso sawo sokusungula isikhwama esiwuR100bn sokuguqula izinto i-Transformation Fund. Nalapha futhi, uma imali izosetshenziselwa ukuxazulula inkinga, kufanele siqinisekise ukuthi le mali izoqhamuka nesixazululo esibambekayo. 

Inselelo yalesi sikhwama wukuthi kufanele sitshengise ukuthi sizokwazi ukukwenza loku, ukuxazulula inkinga ngendlela efanele. Ngeshwa kuloku okushicilelwe, akucaci kahle ukuthi iyiphi inkinga exazululwayo.

Yize sonke sikwamukela ukuthi uguquko kufanele lusheshe, ikakhulu ekuthuthukiseni izinkampani, izingqinamba okufanele kudlulwe kuzo zinzima. 

Kulinganiselwa ukuthi u-70% wamabhizinisi amasha eNingizimu Afrika ayawa ngenxa yezizathu ezihlukene ezinjengokuntula amakhono, ukungakwazi ukufinyelela emakhasimendeni nokungakwazi ukuthola imali yokukhulisa amabhizinisi. Imizamo ehlukene yokulungisa loku okufaka nokuthi i-Broad-Based Black Economic Empowerment kufanele kubekhona imibandela yokuthuthukisa amabhizinisi amancane ibenemiphumela ehlukile. 

Kunezibonelo ezinhle lapho izinkampani ziqale ukusebenzisana nezinkampani zabantu abamnyama ukuqinisekisa ukuthi ziyakhula. Kodwa kunenqwaba yezinye izinkampani ezihlulekile yize zixhaswe ngemali. Bekungalula ukubona ukuthi yini inhloso yalesi sikhwama ukube okushicilelwe kuyaveza ukuthi yini kahle-hle inkinga bese kushiwo nesiphakamiso.

Siyazi ezinkampanini ezilekelela ukuthuthukisa izinkampani ezincane ukuthi kudingeka inqwaba yabantu abacathulisanayo nezinsizakusebenza ukuseka amabhizinisi futhi abasebenza ngakho kusuke kukuncane kunoR100bn.

Okuhle wukuthi umNyango wokuHweba, iziMboni nokuNcintisana usenze lesi siphakamiso njengohlelo oluzokwenziwa ngabamabhizinisi ngokubambisana nohulumeni futhi uyafuna ukuzwa uvo lwamabhizinisi ekuhlanganiseni izinto. 

I-Business Leadership South Africa izokujabulela ukuseka lesi sifiso futhi izolubeka uvo ngesikhathi esifanele.