Kushoda uR16.4 billion esikhwameni sohwebo seNingizimu Afrika 

INTATHELI YOMBELE

UPHIKO oluqoqa intela eNingizimu Afrika iSouth African Revenue Service (iSars) ithi kunemali ewuR16.4 billion engangenanga ngenxa yokungahambi kahle kohwebo.

NgoLwesihlanu iSars imemezele imininingwane ngemali engenile nephumile ezweni uma kuthengwa noma kudayiswa izimpahla.

Imali engenile ngenxa yezimpahla ezidayisiwe phesheya iwuR149.0bn, kuthi ephumile uma iNingizimu Afrika ithenga impahla phesheya ibe wuR165.4 billion. Le mali ihlanganisa nohwebo oluphakathi kweNingizimu Afrika neBotswana, i-Eswatini, iLesotho neNamibia. 

Kusukela mhlaka-1 wangoJanuwari kuze kubemhlaka-31 wangoJanuwari walo nyaka imali engangenanga iwuR16.4bn, okuyisibalo esiphezulu uma kuqhathaniswa noR3.7bn owawungangenanga ngonyaka odlule.

Uma kuqhathaniswa neminye iminyaka izimpahla ezidayiselwe amanye amazwe ngoJanuwari zinyuke ngo-1.2% njengoba ngonyaka odlule ngesikhathi esifanayo izwe lalidayise izimpahla zikaR147.2 billion kanti kulo nyanga izwe lidayise ezikaR149.0bn. 

Izimpahla ezithengwe kwamanye amazwe ziwuR165.4bn kanti ngoJanuwari wonyaka odlule izimpahla ezazithengiwe zazenza uR150.9bn. Uma kubhekwa izimpahla ezidayiswa inyanga nenyanga kuvela ukuthi zehle ngoR10.2bn (u-6.4%) ngoDisemba wonyaka odlule noJanuwari walo nyaka.

Izimpahla ezithengwe kwamanye amazwe zinyuke ngoR20.9bn (u-14.4), zisuka kuR144.5bn ngoDisemba wango-2024, zaya kuR165.4bn ngoJanuwari walo nyaka.

Ukwehla kwezimpahla ezidayiswa ngaphandle kungenxa yokwehla kwegolide elidayisiwe, izimoto nokumbiwayo. 

Ukunyuka kwezimpahla ezithengiwe kunyuswa wukuthi kungethwe imishini eyenziwa kwamanye amazwe, amabhanoyi, izinsimbi zezimoto nokunye.I-Sars ithe izobuye iyehlise nemali ekade imemezele ukuthi isele emva kohwebo, phecelezi i-trade surplus, isuka kuR15.5bn ngoDisemba wonyaka odlule ibe wuR14.7bn ngoJanuwari.