UMasipala waseThekwini nezinhlelo ezinqala zokusimamisa abahwebi
UMASIPALA waseThekwini usanda kwethula izinhlelo ezinqala zokuthuthukisa umnotho wabahwebi abanamatafula engqungqutheleni i-Informal Economy Development Summit.
Le ngqungquthela, ebingomhlaka-17 nomhlaka-18 Okthoba, ibihlose ukwakha isigcawu sokuthi abahwebi abanamatafula, izinhlangano zemikhakha ethile nabalingani badingide amaqhinga okuseka lo mkhakha omqoka.
Kule ngqungquthela cishe abahwebi abanamatafula abawu-100 bathole izitifiketi ngemva kokuphothula unyaka we-New Venture Creation Course, ebigxile ekusimamiseni ibhizinisi.
Usihlalo weKomiti lokuThuthukisa umNotho nokuHlela uMnu uThembo Ntuli ubalule imisebenzi embalwa umasipala ozofaka imali kuzona ngonyaka wezimali u-2024/25, ezihlanganisa imali elinganiselwa kuR35 million. Yonke le misebenzi iyophuthulwa ngoJuni wangonyaka ozayo, u-2025.
Kule misebenzi kubalwa nansi:
• I-Dalton Art and Craft Market (kuWadi 32): Kulo msebenzi wokuvuselela izakhiwo nezitamkoko kaR10m kuzohlomula abahwebi abawu-50.
• I-Mansel Road Market (kuWadi 26): Kulo msebenzi wengqalasizinda kaR15m, okuzokwakhiwa nezindlu ezincane kuzohlomula abahwebi abawu-180.
• I-Tongaat Trader Market (kuWadi 61): Kulo msebenzi wokuvuselela izakhiwo kaR2.5m kuzohlomula abahwebi abawu-35.
• IKwaMaKhutha Business Hive (kuWadi 94): Kulo msebenzi wokuvuselela izakhiwo kaR4m kuzohlomula abahwebi abawu-42.
• I-Klaarwater Business Hive (kuWadi 17): Lo msebenzi wokuvuselela izakhiwo kaR4.3 uzomumatha abahwebi abawu-26.
UNtuli uthe le misebenzi izodala umsebenzi kubantu bendawo, uthuthukise ingqalasizinda ukuze kuphucuke isimo sokusebenza kwabahwebi abancane, okuzosimamisa umnotho.
Ubalule imisebenzi eyishumi ephothulwe ngonyaka wezimali u-2023/24. Umasipala usanda kukhangisa ngezikhala zamatafula okuhweba kanti ukufaka isicelo kuvala mhlaka-31 Okthoba.
Abahwebi abafisa ukufaka isicelo bangathola izikhangiso ngokungena kwi-website kaMasipala waseThekwini ethi www.durban.gov.za bese bengena ewindini elithi Public Notices noma baciphize i-link ethi: https://www.durban.gov.za/pages/government/documents?d=Public%20Notices/Public%20Notices%202024/October%202024