Ugobe uphondo obehola i-Absa

WUSLINDILE KHANYILE

I-ABSA iqoke isikhulu esiphezulu esiyibamba esizothatha izintambo mhlaka-15 ngo-Okthoba uMnu uCharles Russon. 

Uzongena ezicathulweni zikaMnu u-Arrie Rautenbach ozothatha umhlalaphansi. U-Rautenbach, obesesebenze kuleli bhange iminyaka engaphezu kwewu-27, uyogcina ngomhlaka-15 Ephreli ngonyaka ozayo kodwa uyoqale ahlale ekhaya izinyanga eziyisithupha engasebenzi, okuhambisana nemigomo yesikhundla sakhe. 

Lesi sikhulu esiphezulu sisanda kusolwa ngokucwasa ngokwebala abaphathi babantu abamnyama, udaba olwabikwa yi-Sunday Times ezinyangeni ezimbalwa ezidlule.  

U-Russon uyisikhulu esiphezulu se-Corporate and Investment Bank (iCIB) kusukela ngo-2018 kanti usebeyilungu lesigungu esiphezulu kusukela ngo-2014. Ufike e-Absa Capital ngo-2006 ezoba yisikhulu esiphezulu kanti usephathe izikhundla ezihlukene. 

Une-BCom yaseRhodes University kanti wakewasebenza eKPMG, eMerrill Lynch naseDeutsche Bank futhi uyilungu leSouth African Institute of Chartered Accountants.  

Isikhundla sikaRusson eCIB sizobanjwa wuNks uYasmin Masithela. Okwamanje uyi-managing executive: Corporate Transactional Banking, CIB kusukela ngo-2019. Useke waba yi-group executive: Strategic Services ne-chief compliance officer.  

Uneziqu i-BA ne-LLB zase-University of Cape Town ne-Diploma in Company Law, i-LLM ne-Tax Law zaseWits University.  

Khonamanjalo, leli bhange lishicilele imiphumela yalo yesigamu sokuqala sonyaka esiphele ngoJuni 30 kanti inzuzo eliyenzile yehle ngo-5%, yafinyelela ku-R10.2 billion.  

Inzuzo eNingizimu Afrika yehle ngo-7%, yafinyelela ku-R6.6bn, kwathi kwamanye amazwe esebenzela kuwona e-Afrika yehle ngo-1%, yaba wuR3.6bn.  

FUNDA LAPHA: https://www.umbele.co.za/2024/08/16/i-std-bank-ingenise-inzuzo-ewur22bn/