UMasipala waseThekwini uzoklomelisa abavelele kwezokuvakasha. INTATHELI YOMBELE iyabika
IYAQHUBEKA imizamo yokuvuselela imboni yezokuvakasha eThekwini, KwaZulu-Natali, kwazise le mboni ingenye yezakhahlamezeka kakhulu ngenxa ye-COVID-19.
Ngesonto elizayo uMasipala waseThekwini neDurban Tourism bazobanomcimbi wokuklomelisa osomabhizinisi abasembonini yezokuvakasha, iDurban Tourism Business Awards.
Kunosomabhizinisi abawu-155 okuzokhethwa kubona abawinile emikhakheni ehlukene. Lo mcimbi uzoba se-Inkosi Albert Luthuli International Convention Centre mhla ka-15 Juni kanti enye inhloso yawo wukuqhakambisa amabhizinisi enza umsebenzi omuhle ukuhehela izivakashi kuleli dolobha.
Phakathi kwemikhakha ekhona kubalwa i-Accommodation, Visitor Experience and Restaurants, Meetings, Exhibitions, Special Events, Tourists Guides, Tour Operators, Rickshaw Puller, Crafters, Event Owners nama-Promoter.
Kukhona ne-Universal Accessibility Sub-category, i- Emerging Tourism Entrepreneur of the Year ne- Upcoming Filmmaker. Kukhona nama-Mayoral Special Achievements Awards okukhethwa kuwona.
Odle umhlanganiso uzowina uR35 000, olandelayo athole uR25 000. Abawina emkhakheni okhethwa yimeya bathola ithuba lokuvakashela phesheya, okuwuhambo lukaR100 000. Ngonyaka odlule abawina kulo mkhakha baya kwi-Arabian Travel Market eDubai.
IMeya yaseThekwini uMnu uMxolisi Kaunda ithe: “Ezokuvakasha yimboni ebalulekile emnothweni wedolobha lethu. Inhloso yethu wukwandisa abatshalimali embonini.
“Kuyasijabulisa ukwenza le miklomelo okwesibili. Wumkhankaso obalulekile kumasipala njengoba sizama ukugqugquzela osomabhizinisi abancane nabakhulu embonini yezokuvakasha,” kuphetha yena.