Kuleli sonto kuSAZIWAYO NEMALI sixoxa noFundiswa ‘FundiFab Teddybear’ Xaba, umethuli we-Intokozo with FundiFab Talk kwi-Intokozo FM, umphathi wohlelo nomsunguli weFundi Media neFundiswa Foundation. UFundiFab useke waba wumsakazi kwi-Izwi Lomzansi FM, Imbokodo FM neVuma FM

Usemncane wawuphiwa imali?

Yebo, ngangiphiwa. UMa wayengipha imali ngisemncane. Esikoleni ngangiphatha isitsha sokudla, ngiphatha nemali. Imali ngayiphatha kusukela e-primary (school) ngaze ngafika e-high school ngoba ngangifunda esikoleni uMa ayefundisa kusona.

Waqala nini ukuba ne-akhawunti yasebhange futhi wayivula kuliphi?

Ngaqala ukuba ne-akhawunti ngo-2008, ngayivula eNedbank.

Ekukhuleni kwakho, yini oyikhumbulayo nowayifunda ngemali?

Ngangithenga izinto ezimnandi ngemali engiyiphiwayo.

Uqale nini ukusebenza kanti kwakuyimalini umholo wakho?

Konje ngake ngayitoho? Uma ngikhumbula kahle umholo wami wokuqala kwakuwuR3 000.

Wawenzani umholo wakho wokuqala?

Ngathenga izinto zokugqoka. 

Yini into enhle ongathi usuke wayenza ngemali?

Ngazithengela umbhede; kwakuyi-king size ukuze nginethezeke.

Yiliphi iphutha elithinta imali osuke walenza? 

Cha, alikho. 

Wake walutheka mhlawumbe ngokungena “ebhanoyini”? 

Cha, angikaze. Ngihlale ngiqaphele ngezinto ezithinta imali.

Yisiphi iseluleko esihle owasithola ngemali?

Wukuthi kufanele ngiyonge, ngiyibeke ukuze ngiyisebenzise mhla kunesidingo.

Uma ungawina uR1 million kwi-lotto ungawusebenzisa kanjani?

Ngingazithengela umuzi, imoto, ngilungise ekhaya bese nginikela.

Ungabeluleka uthini abanye abasemkhakheni wakho ngokuphatha imali?

Into eyodwa engingayisho wukuthi abayeke ukugijimela igama. Siphi nje isidingo sokuthenga isikhwama sikaR30 000 kodwa umuntu akakhile kubo?