Bahambe behleka bodwa osomabhizinisi abahlonishwe emcimbini wemiklomelo. INTATHELI YOMBELE iyabika
KUKLONYELISWE osomabhizinisi abasafufusa abenza ezibukwayo emcimbini wemiklomelo weDurban Business Fair ese-Inkosi Albert Luthuli Convention Centre eThekwini, KwaZulu-Natali.
Lo mcimbi obumhla ka-21 Septhemba ebusuku ubuhlelwe wuMasipala waseThekwini kanti uxhaswe yibhange Ithala neW&R SETA. Imiklomelo ibizwa ngamaDBF Excellence Awards kanti ahambisana neminye ebizwa ngeLions’ Den.
Imikhakha yemiklomelo ngamaSMME Excellence Award, iRural/Township Based Award, iYouth-owned Business Award neLong-standing Special Recognition Award kanti umklomelo wuR50 000 umkhakha ngamunye.
Abadle umhlanganiso yiSiko Republik kaNkk uJabu Gwala, eyenza imisiko yokujima ehlotshisiwe ngemibala egqamile yase-Afrika, enqobe umklomelo webhizinisi lomuntu wesifazane.
KwiLions’ Den kunqobe uNks uPinky Myeza we-Alabaster Touch Day Spa noMnu uNjabulo Njapha we-Afrikani-sh emkhakheni webhizinisi elisafufusa, uNksz uThembalethu Shange we-Integrate Legal Education noMnu uSifiso Shezi weCWHS Trading emkhakheni kasomabhizinisi osevuthiwe, kwathi uNks uNozipho Thakane weClean Fest no-Ayanda Shezi A&B Poultry Supply badla umhlanganiso emkhakheni we-Entrepreneurial Excellence.
Sekuwunyaka wesi-24 ikhona iDBF kanti eyango-2022 ngeyokuqala bukhoma seloku kwaba iCOVID-19. Abebehambele umcimbi wusihlalo we-Economic Development and Planning Committee uMnu uThanduxolo Sabelo, iphini lemenenja kaMasipala waleli komidi uMnu uPhillip Sithole, inhloko yeBusiness Support, Tourism and Markets Unit uMnu uThulani Nzama, isikhulu esiphezulu se-Ithala uNkk uPearl Bhengu nemenenja yezokuKhangisa nokuXhumana eW&R SETA uNks uMartha Shingange.
Ethula inkulumo yokukhuthaza nokuhalalisela osomabhizinisi, uSomlomo kaMasipala waseThekwini uMnu uThabani Nyawose uthe: “Namhlanje sibungaza osomabhizinisi abasafufusa kuMasipala waseThekwini. Labo somabhizinisi bazuze lukhulu kule minyaka besebenza. Kuhle nokubona ukuthi le miklomelo ivuleleke kwababhalisile ukukhangisa kulo mbukiso, okuyinto enhle ngoba sibheka umsebenzi oseqophelweni eliphezulu kwababamba iqhaza embukisweni wedolobha ohamba phambili. Ngibancoma kakhulu labo somabhizinisi abakhona namhlanje.”