Umasipala uvulele intsha ithuba lokwenza izinto zokuhlanza
INTATHELI KAMASIPALA
INTSHA ewu-30 yaseThekwini esafufusa kwezamabhizinisi namalungu emifelandawonye ithola ithuba eliyingqayizivele lokufunda ukwenza imikhiqizo yokuhlanza ukuze ikwazi ukusungula nokukhulisa amabhizinisi anekusasa.
Loku kuqeqeshwa kwamasonto amabili, i-Detergent Manufacturing Training Programme, luhlelwe uphiko lukaMasipala waseThekwini olubhekele ukuthuthukisa amabhizinisi amancane ngokubambisana neNetworx for Career Development.
Lolu hlelo beliseNew Germany, lwaqala ngomhlaka-1 wangoJuni kanti luphethe namuhla, mhlaka-12.
Luhlanganisa uhlelo lokuqeqesha amabhizinisi amasha iNew Venture Creation.
Ngesonto lokuqala, ababeqeqeshe bafundiswe ukuphatha imali, ukwenza isabelomali, ukukhangisa, ukubeka amanani nokudayisa.
Ngesonto lesibili, bagxile ekwenzeni imikhiqizo ngezandla, okubalwa kuyo i-bleach, i-pine gel nensipho yokuwasha izitsha.
FUNDA NALAPHA: Intsha eyikhulu izoqeqeshelwa amakhono omsebenzi wengqalasizinda
Umqeqeshi uNozipho Mkhwanazi uthe lolu hlelo luhlomisa intsha amakhono obuchwepheshe namakhono ebhizinisi.
“Abaqeqeshwayo bazimisele kakhulu futhi bathola ulwazi oluzobasiza ukwakha amabhizinisi anekusasa futhi aqhubeke isikhathi eside,” kusho yena.
Abaqeqeshwayo banikwe imikhiqizo abayenzile, imishini efana nezikali nesibonelelo sezinyanga ezintathu.
KuMuzi Makhaye, umsunguli weSkumulweni Trading eShongweni, uthe loku kuqeqeshwa kubeyithuba lokwandisa ibhizinisi lakhe lesitolo esincane.
“Ngifuna ukwenza imikhiqizo yokuhlanza ukuze ngiyidayise esitolo sami nakwezinye izitolo endaweni yangakithi.
“Loku kuqeqeshwa kunika amakhono abalulekile azongisiza ukukhulisa ibhizinisi lami,” kusho yena.
UPhilani Duma we-Apex Events eNazareth, ePinetown, uthe lolu hlelo lumvulela indlela entsha yokungenisa imali.
“Ukufunda ukwenza imikhiqizo yokuhlanza kuyikhono elisha elibalulekile elingivulela amathuba engeziwe ebhizinisini,” kusho yena.
U-Anele Dlamini, umsunguli weSfundosesabelo Trading, uthe ukuqeqeshwa kufeza isifiso sakhe sebhizinisi.
“Bekuhlale kuyisifiso sami ukuhlinzeka ngemikhiqizo yokuhlanza. Ngisanda kuthola indawo yokuhweba kuMasipala waseThekwini eKwaSanti Informal Trading Market futhi ngizosebenzisa lolu sizo lwemali ukuthenga amakhemikhali ukuze ngiqale ukukhiqiza nokudayisa,” kusho yena.
Usihlalo weKomiti lokuThuthukisa nokuHlela umNotho kuMasipala waseThekwini, uMnu uThembo Ntuli uthe lolu hlelo luyingxenye yemizamo kaMasipala yokulwa nokuntuleka kwemisebenzi ngokugqugquzela abantu ukuthi bazisebenzele futhi basungule amabhizinisi.
“Lolu hlelo luyingxenye yokuzibophezela kwethu okuqhubekayo ekuthuthukiseni amabhizinisi nemifelandawonye ngokubanika amakhono aphathekayo namathuba okwenza imali.
“Siyakwazisa ukubambisana kwethu neNetworx for Career Development, ngoba ukusebenzisana kukahulumeni nezinkampani ezizimele kusenza sikwazi ukuseka nokuthuthukisa amabhizinisi amaningi,” kusho uNtuli.