Owayeka ubuthisha usewumlimi odlondlobalayo

WUTHOBILE ZWANE

UKUSHIYA umsebenzi wokufundisa kwakungesona isinqumo esilula kowesifazane onothando lokulima waseKokstand ngenxa yentshisekelo yokubanepulazi.

UNksz uNozuko Cezula, oneminyaka ewu-49, wayeka umholo wobuthisha wanyanga zonke ngo-2011 wagxila epulazini lakhe iTafelkop Farm, ngaphansi kwenkampani ayiqambe ngegama lakhe iNozuko Farming.

Namuhla ipulazi lakhe elingamahektha awu-93 likhiqize amathani awu-1 500 ombila awadayisela iKokstad Milling namanye awu-1 500 awadayisa ezimakethe zakwamanye, okubala neMexico kuwona. Ipulazi lidayisela izinkomo iKaran Beef, lidayisele i-East Griqualand Meat Supply amaduna ezimvu awu-100.

Njengeningi labalimi abamnyama abasuke beqala ukungena embonini yezolimo wayengenayo imali eyanele yokusebenza. Wayengenasiqiniseko sokuthi uzophumelela.

FUNDA NALAPHA: https://www.umbele.co.za/2025/07/29/owayefuna-ukusebenza-ehhovisi-usewumlimi-nomfuyi/

Kwizinselelo aseke wabhekana nazo, uNksz uCezula ubale eyokungabi nemali yokuqala umsebenzi nokungabibikho kwezimakethe ezanele esifundeni sangakubo sokudayisa umbila.

Uthi: “Isimo saqala ukushintsha ngesikhathi umNyango wezoLimo nokuThuthukisa iziNdawo zaseMakhaya KwaZulu-Natali ungisiza ngemali. Ngisizakele ngemishini yokulima phakathi kwango-2022 no-2024. Loku kwenza umehluko omkhulu ngoba emva kwalezo zivuno ngikwazile ukuthenga ezinye izinsizakusebenza.”

_{UNksz uCezula kudedangendlale wepulazi lakhe iNozuko Farming nomhlambi wezinkomo zakhe}

Ukukhula kweNozuko Farming kuvule amathuba emisebenzi awu-21, okukhona kuwo awezisebenzi eziyisithupha ezisebenza ngokugcwele, neziqhenya ngokuthi zihola imali esemthethweni, nezinye ezisebenza ngezikhathi ezithile uma kunesidingo.

Ukudala amathuba omsebenzi kubantu bendawo nakwezinye izindawo ezihlomula ngomsebenzi wepulazini lakhe kuyamjabulisa uNksz uCezula. 

Ululeka abantu abafisa ukuqala ibhizinisi abo ukuthi bangasabi ukuqala. “Qala ngaloko onako futhi ukholelwe kwizifiso zakho. Ibhizinisi lifuna ukubekezela, ukusebenza kanzima nokungapheli amandla,” kululeka yena.

UNksz uCezula ufisa ukukhulisa iNozuko Farming, andise umkhiqizo ukuze usabalale kakhulu ezimakethe zangaphandle futhi adale namanye amathuba omsebenzi.