Zigcine zikhokhelwe imiholo kaDisemba izisebenzi zikaMasipala waseMpendle

YINTATHELI YOMBELE

NGEMVA kokungenelela komGcinimafa wezwe, uMasipala waseMpendle ubike ukuthi imiholo yezisebenzi ikhokhwe izolo.

Isimo besimuncu kwizisebenzi zikamasipala ngemva kokungaholi ngoDisemba. Ungqongqoshe wesifundazwe womNyango wokuBusa ngokuBambisana neziNdaba zoMdabu KwaZulu-Natali uMfu uThulasizwe Buthelezi ubekhiphe umyalelo wokuthi izikhulu zikamasipala azilusukumele lolu daba umnyango ungaze uthathe izinyathelo ezinqala. Bekungesikho okokuqala izisebenzi zingaholelwa, njengoba kwenzeka ngoMeyi kulo nyaka.

UButhelezi ubethe: “Kudabukisa kakhulu ukuthi izisebenzi zikamasipala nemindeni yazo basebenzimeni obunje ngalesi sikhathi samaholidi kaKhisimusi. Akwemukelekile ukuthi izisebenzi zisale dengwane ngenxa yokuhluleka kukamasipala.”

Umkhulumeli kamasipala uMnu uThami Mkhulisa ucashunwe yiphephandaba i-The Mercury ethi umGcinimafa ugcine uyidedele ingxenye yesabelo sikamasipala, phecelezi i-equitable share, ebibanjiwe.

FUNDA NALAPHA: https://www.umbele.co.za/2025/05/29/umcwaningimabhuku-usole-izimeya-nosomlomo-ngokungaphathi-kahle-izimali-komasipala/

UMkhulisa uthe imbangela yokushoda kwemali yokuholela izisebenzi wukuthola imali yesabelo engaphelele kumGinimafa. Uthi umasipala wawulindele uR16 million kodwa wanikwa uR4m.

Ubaluleke ukuthi akuzona zonke izisebenzi zikamasipala ebezingaholile, wathi eziwu-110 beziholile, kwasala eziwu-60.