Ingqalasizinda yamabhizinisi amancane izophuculwa ngoR370 million
YINTATHELI KAMASIPALA
KUZOTSHALWA uR370 million eminyakeni emithathu ezayo ekuphuculeni ingqalasizinda yabahwebi abangabhalisiwe namathuba okuthuthukisa amakhono abahwebi.
Imeya kaMasipala waseThekwini uMnu uCyril Xaba yenze lesi simemezelo esiyingqophamlando engqungqutheleni i-Economic Development (iLED) Summit ebise-Inkosi Albert Luthuli International Convention Centre ngoLwesibili noLwesithathu.
Kule ngqungquthela bekuhlangene osomabhizinisi, izifundiswa, osomabhizinisi abangabhalisiwe, amakhosi nabamele uhulumeni nomphakathi.
Inhloso yale ngqungquthela bekuwukwenza ukuthi kuhambisane izinhlelo zomnotho zikamasipala, uhulumeni wesifundazwe nowezwe, ukunciphisa imicikilisho nokuphucula indawo yokusebenza, ukwenza izinto ezintsha nokutshala emnothweni.
I-LED ihlose ukuhlomisa imiphakathi, ukuqinisa izindlela zokuhwebelana, ukukhuthaza ukubambisana phakathi kwamabhizinisi endawo, imifelandawonye, amabhizinisi amakhulu, ezemfundo ephakeme nohulumeni.
FUNDA NALAPHA: https://www.umbele.co.za/2024/10/23/umasipala-wasethekwini-nezinhlelo-ezinqala-zokusimamisa-umnotho-wabamatafula/
Izindawo eziningi eThekwini azikho emnothweni omkhulu ngenxa yokungalingani ngenxa yomlando, ingqalasizinda engenele, ukungakwazi ukuthola amathuba osizo lwemali, ukushoda kwamakhono nokungesekwa yizikhungo ngokwenele.
UXaba ugcizelele ukuzibophezela kukaMasipala ekwenzeni ukuthi iLED ibeyinsika kahulumeni wasekhaya oletha intuthuko.
“Yingakho silapha namhlanje ukubeka eqhulwini lohlelo lweLED ukuletha intuthuko, ukuvuselela ingqalasizinda, ukusimamisa umnotho, ukuthuthukisa amakhono, ukudala amathuba omsebenzi nokufaka imiphakathi,” kusho yena.
Ugcizelele ukuthi le ngqungquthela ihambisana nemizamo ebanzi yedolobha yokukhulisa umnotho, ukukhuthaza ukutshala imali, ukweseka amabhizinisi amancane naphakathi nendawo nokuthuthukisa amabhizinisi.
“Silapha ukuzoxixasana, ukukhuthaza abantu ukuthi babambe iqhaza, ukuxazulula izinkinga ngokubambisana nokwenza izibopho ezizoletha imiphumela ebambekayo nebonakalayo emiphakathini yakithi namabhizinisi endawo,” kwengeza uXaba.
Imenenja yeDolobha uMnu uMusa Mbhele ubaluleke ukuthi uhlelo lwentuthuko lwaseThekwini luncike kwi-Integrated Development Plan ne-District Development Model One Plan, okusekelwe kwintuthuko efaka wonke umuntu.
“I-eThekwini Municipality Informal Economy Policy iyazi ukuthi osomabhizinisi abangabhalisiwe, osomabhizinisi abancane, amabhizinisi omphakathi kumqoka emnothweni. Osomabhizinisi abangabhalisiwe bawumgogodla womnotho kuleli dolobha,” kusho yena.
Usihlalo weKomiti lokuThuthukisa umNotho uMnu uThembo Ntuli ugcizelele ukuzibophezela kukamasipala ekwesekeni amabhizinisi amancane, imifelandawonye, wathi amqoka emnothweni ofaka wonke umuntu.
“Ayinsika yomnotho wethu futhi akhulisa umnotho. Siqinisa indlela yokukhipha umsebenzi, ukuthola usizo lwemali nokucija ngamabhizinisi futhi sitshala ekuthuthukiseni amakhono ngokubambisana namanyuvesi, izikhungo zokuqeqesha nemboni ezimele ukucijela intsha yethu imisebenzi yangomuso,” kuphetha yena.