Usungule ubuchwepheshe obusamuntu bamatekisi
WUTHOBILE ZWANE
USOMABHIZINISI waseLimpopo wabona ukuthi imboni yamatekisi isele emuva ekusebenziseni ubuchwepheshe. Kwamholela ekutheni acabange ngendlela angasiza ngayo ngokwakha isixazululo esisebenzayo.
UMnu uMbavhalelo Mabogo, waseThohoyandou, wasungula iQuickloc8, ngo-2018 ngenhloso yokuletha ubuchwepheshe besimanje embonini yamatekisi.
UMabogo oneminyaka ewu-35 ugabe ngeziqu, okubalwa i-Master’s degree in Mechanical Engineering, i-Diploma in Manufacturing and Design ne-MBA yaseStellenbosch University Business School.
I-Quickloc8 isebenzisa ubuchwepheshe obusamuntu ukusiza abanikazi bamatekisi ukuthi balandele ukusebenza kwezimoto zabo nabashayeli. Amakhamera alobu buchwepheshe akwazi ukubala abagibeli abangenayo nabaphumayo etekisini, okwenza kubelula ukulandela uhambo nokwazi ukuthi imoto ikuphi nokuthi umshayeli wenzani.
I-app yaseQuickloc8 wubuchwepheshe obenzelwe imboni yamatekisi
Ngaphezu kwalokho, uthi le app iletha nokuphepha okwengeziwe njengoba ixhumanisa abashayeli nabagibeli kanti umnikazi wetekisi ukwazi nokulawula imoto ekude, njengokuyimisa noma ukuyivala uma kunesidingo.
I-app yaseQuickloc8 iveza bukhoma lapho itekisi ihamba khona
Uthi eqala kwakungelula kodwa isifiso sokubona amabhizinisi ethuthuka kwamenza aqhubekele phambili. Uthi into ayifunde ngokuphatha ibhizinisi wukunaka yonke into, ngisho nebukeka incane. Uthi ekuqaleni wayengayinaki eminye imisebenzi efana nokuphatha kodwa ngokuhamba kwesikhathi wabona ukuthi ibalulekile.
“Izinselelo engihlangabezane nazo zifaka ukunganaki izinto engangicabanga ukuthi azibalulekile kanti ngokuqhubeka kwesikhathi ziyabuya zikushaye. Ukuphatha ibhizinisi kungifundise ukusebenza nabantu nokuxazulula izinkinga zangempela,” kusho yena.
Uthi ibhizinisi lakhe selikhule laze laqasha izisebenzi ezingaphezu kweziwu-25 futhi zisebenza ezifundazweni ezihlukene, okubalwa kuzona iKwaZulu-Natali, iGauteng, iLimpopo, iMpumalanga Kapa neNtshonalanga Kapa.
Kubantu abafisa ukuqala ibhizinisi, umyalezo wakhe uthi: “Gxilani ekuxazululeni izinkinga zangempela. Ungaqali nge-app ufuna imakethe, qala ngemakethe bese wenza isixazululo.”
Ngekusasa leQuickloc8, uthe libukeka liqhakazile kanti uhlela ukuthula eminye imikhiqizo ezothuthukisa imboni yamatekisi, ikakhulu kwezokuphepha nokuxhumana, nokwandisa izindawo abafinyelela kuzona ezweni.