Umasipala uxhumanisa osomabhizinisi abancane nemboni yezimoto 

YINTATHELI KAMASIPALA 

OSOMABHIZINISI abancane abebesemncintiswaneni kaMasipala waseThekwini ubambisene nemboni ekhiqiza izimoto baklonyeliswe ngezizumbulu.

Umncintiswano i-Spingboard Pitching Competition ubuhlelwe yiDurban Automotive Cluster (iDAC) ibambisene neToyota South Africa Motors noPhiko lokuThuthukisa umNotho lukamasipala. 

Bekuncintisana osomabhizinisi abancane abawu-26 emcimbini obuseRiverside Hotel eThekwini. Inhloso yalo mncintiswano wukuqinisekisa ukuthi imboni ekhiqiza izimoto isimamisa amabhizinisi amancane ngamakhono nezinsiza ezidingekayo ukuze izimboni ezinkulu zikwazi ukuthenga kubona izinsiza zokukhiqiza. 

Iphini lenhloko yoPhiko lokuThuthukisa umNotho kumasipala uMnu uTakalani Rathiyaya lithe bayakuthakasela okwenziwa yiDAC ukusimamisa umnotho waseThekwini nokuheha abatshalimali. 

FUNDA NALAPHA: Osomabhizinisi baseMelika bathembisa ukutshala imali eThekwini

URathiyaya uthe uma izimboni zaleli dolobha zikhiqiza izinsiza ezizosiza izimboni ezinkulu ukukhiqiza imboni yokukhiqiza izokhula. 

Amabhizinisi amathathu abelane ngoR60 000 kulo mncintiswano kube yi-AGP Manufacturing, ewine umklomelo we-Best Elevator Pitch yathola uR20 000. 

IPhumelela Gasinga Engineering Solutions iwine umklomelo we-Best Booth, iXO Collection yawina owe-Best Innovation yahlabana ngoR25 000.

Umsunguli weXO Collection uNks uXoliswa Hlongwane ubonge iDAC nomasipala ngokuqhubeka nokuseka abakhiqizi abancane. 

“Ngithakasile ukuthi ngifike kulesi sigaba ukukhangisa ngomsebenzi wami kubaholi bemboni nokuklonyeliswa ngawo kungenza ngithakase kakhulu,” kubonga yena.