Owakhula ethengelwa izicathulo ezihlekisayo usenza ezinesitayela
WUTHOBILE ZWANE
INSIZWA yaseSekhukhune, eLimpopo, eyakhula ithengelwa izicathulo engazithandi yanquma ukuzenzela ezithandwa yinhliziyo yayo.
UMnu u- Ike Lekgoro, osezinze e-Edenvale, e-East Rand, eGauteng, ngenxa yebhizinisi wasungula iTlotlego Legendcraft ngo-2016, eyenza izicathulo zabantu besilisa, amabhande esikhumba nezikhwama kwesikhumba.
Le nsizwa eneminyaka ewu-39 edabuka Ga-Nchabeleng ithi yaqamba ngegama lengane yayo eyashona ngo- 2016 uTlotlego, okusho ukuhlonipha ngesiPedi.
Uthi uyise wayejwayele ukumthengela izicathulo ezimbi ezazimenza ahlekwe yizingane zakubo. Esekhathele wukuba yinhlekisa, wagcina eqala ibhizinisi elizosiza nabanye ababefuna izicathulo ezisesitayeleni.
“Ngangifuna ukwenza okuthile okutshengisa ukuthi ngiwubani. Uthando lwami lokwenza izicathulo lwaqala kudala ngaphambi kokuthi ngibenamathuluzi nendawo yokusebenzela. Ngazifundisa ukwenza lo msebenzi ngoba ngifuna ukubanezicathulo ezinhle zesikhumba. Okunye wukuthi ngabona isikhala emakethe lapho bantu befuna izimpahla zesikhumba eziqinile nezinesitayela ezenziwe eduze,” kusho yena.
ITlotlego yenza izimpahla zesikhumba zekhethelo ngezandla efemini yayo ese-Edenvale. Yenza izinto ngokwezifiso zekhasimende ngalinye.
ULekgoro uthi wakhangwa yimboni yesikhumba ngenxa yobuhle nokuziphatha kwayo. Wayethanda indlela isikhumba esiguquka ngayo sibeyinto ewusizo nenhle.
FUNDA NALAPHA: https://www.umbele.co.za/2025/09/22/inkinga-yamakhona-ezinyaweni-imnike-umqondo-wokwenza-izicathulo/
ULekgoro uchazwa yindlela abantu bendawo abazisa izimpahla ezenziwe endaweni nokuzwa amakhasimende encoma imikhiqizo yakhe athi ihlala isikhathi eside nokuqala into phansi ize iphele.
ITlotlego isinezisebenzi ezine ezinamakhono. Ukudala amathuba omsebenzi enye yezinto ezimjabulisa ngokubawusomabhizinisi.
Uthi ukuqala nokukhulisa ibhizinisi lokukhiqiza isikhumba kunezinselelo eziningi. Ubale ukuswela imali yokwenza umsebenzi, imishini ebizayo, ukufinyelela ezimakethe, ukujwayeza amakhasimende ukuthi athembe umkhiqizo wendawo omusha nokuncintisana nabakhiqizi abaziwayo.
ULekgoro uthi ufundile kulezi zinselelo ngokusebenzisa anako nokuphucula umsebenzi ngaso sonke isikhathi.
Iseluleko sakhe kwabafisa ukuqala ibhizinisi, ikakhulu intsha, wukuthi baqale lapho bekhona. “Ungalindi ukuthi kuze kuvume isikhathi. Sebenzisa loko onako, ukhule kusukela lapho. Funda emaphutheni, yakha ubudlelwano namakhasimende, yibanentshisekelo nokubekezela ukuze uphumelele,” kusho yena.
ULekgoro ufisa ukubona iTlotlego inefemu enkulu, iqashe abantu abaningi futhi ikhiqiza nezicathulo zesikole eziyinguganaboya kodwa ezingabizi.
Facebook: Tlotlego Legendcraft
Instagram: @tlotlegolegendcraft