Okholelwa ekubeni yisosha elizikhuzayo useqashisa ngezinto zemicimbi ezidle ngesitayela
WUTHOBILE ZWANE
OWAQALA ibhizinisi lokubolekisa ngezinsiza zomcimbi ngendlu yangasese eyodwa nefriji elilodwa usenebhizinisi elivuthayo elixhaswa wumphakathi nosaziwayo.
UNksz uLucy Maila Phaka waseSeshego, ePolokwane, eLimpopo, wasungula iVexloStyle Function Hire ngo-2010. I-VexloStyle Function Hire iqashisa ngezimpahla ezidingeka emicimbini okubalwa kuzona izindlu zangasese ezijwayelekile, ezomntakabani, amafriji angomahambanendlwana, amatende, amatafula, izihlalo, izindwangu nokunye.
“Ngaqala ukuqashisa ngezinto zemicimbi ngo-2010. Ngaleso sikhathi nganginendlu yangasese eyodwa nefriji elilodwa kuphela,” kukhumbula le ntokazi eneminyaka ewu-38.
I-VexloStyle isizakhele udumo ngokuhlela imicimbi emikhulu nesezingeni eliphezulu. “Ngisebenze noShandesh, umculi weLikompo, emcimbini we-Meet & Greet owawuseJack Borders Hall. Ngisebenze noHunadi The Host, umsakazi weThobela FM. Kuyimanje ngimatasa ngihlela omunye umcimbi omkhulu ozobamaduze,” uNksz uPhaka.
Uthi waqala ibhizinisi ngoba engafuni ukusebenzela omunye umuntu aze abeneminyaka ewu-40, wanquma ukwenza okuthile. Waqala ngokuqashisa ngama-chafing dish wase ekhulisa ibhizinisi kusukela lapho.
“Ekuqaleni ibhizinisi lalihamba kancane futhi ngangisasebenza ngokugcwele. Ngazitshela ukuthi njengoba u-40 ususeduze kufanele ngenze izinto ngokuzimisela. Ngazibophezela ngokugcwele ekukhuliseni iVexloStyle Function Hire, kuze kubeyimanje ngisayibambile,” kusho yena.
FUNDA NALAPHA: https://www.umbele.co.za/2025/10/02/baxazulula-inkinga-yokungcola-ngamadramu/
Echaza ngegama lebhizinisi elithi VexloStyle Function Hire uthe likhuluma ngesitayela asiphethe. “Empeleni leli gama lavela kothile engangisebenza naye, intokazi emhlophe eyake yangitshela ukuthi ngikwazi ukukhetha izinto ezinhle ezinestayela. Saqala ukusho amagama achaza isitayela, lafika njalo eleVexloStyle,” kukhumbula uNksz uPhaka.
Le ntokazi ithi yaqonda kusenesikhathi ukuthi izindlela zokuphila zesimanje zakha imakethe yemicimbi. “Iningi lentsha kulezi zinsuku, empeleni hhayi nje intsha kodwa abantu abasazithengi izinto zomicimbi. Usuku nosuku, abantu baqasha izinto zomngcwabo, imishado, ezokukhumbula amatshe nezamaphathi. Nsuku zonke ngithola ucingo kubantu abafuna ukuqasha okuthile. Loko kwenze ngabona ukuthi likhona ibhizinisi kule mboni,” kusho yena.
Ithimba lakhe selandile. Usenezisebenzi ezintathu aziqashe ngokugcwele neziyisikhombisa eziyitoho.
Nakuba iVexloStyle imatasa futhi idlondlobala kodwa ukukhula kunezinselelo zako, njengokwenzelwa phansi ngabantu. UNksz uPhaka uthi benomcimbi omkhulu, kwesinye isikhathi abantu okufanele asebenze nabo bamenzela phansi.
“Babanezaba ezinjengokuthi, ‘Ngeke ngikwazi, ngimatasa.’ noma bacime izingcingo zabo. Kuyadumaza kodwa sibakhona isisombululo ngoba kufanele umsebenzi uqhubeke,” kusho yena.
Ufisa ukubanamagatsha ezweni lonke nokuthi izinto zakhe ziqasheke online ukuze akwazi ukuzihambisela amakhasimende ezindaweni ezihlukene.
Njengomakadebona ebhizinisini, unamasu kwabacabanga ukuqala. Uthi: “Ngingathi kuyenzeka kodwa kudinga ukuthi uzinikele, ubekezele futhi usebenze ngokuzikhandla. Kufanele uzazi ukuthi ufunani futhi ubewumuntu ozikhuzayo. Uma ngibuka esenginako manje ngiye ngibone ukuthi ngamosa isikhathi ngisebenzela omunye umuntu,” kusho yena.
TikTok: @vexlostyl
Facebook: Lucy Maila Phaka – queenb