Benza i-pizza elokishini ngendlela yasendulo yamaNtaliyane
WUTHOBILE ZWANE
UKUSEBENZA endaweni yokudla eyayigxile ekwenzeni ama-pizza kwamkhuthaza ukuthi aqale leli bhizinisi elenza ukudla kwamaNtaliyane elokishini.
UMnu uSwelihle Mhlongo wasungula iThe People’s Fire House eMbali, eMgungundlovu, KwaZulu-Natali ngo-2021 nomngani wakhe.
Ngemva kokubheduka kwe-Covid-19 ngenkathi eyi-chef eThekwini, bamiswa emsebenzini. Ngesikhathi lensizwa eneminyaka ewu-29 ihleli ekhaya yafikelwa wumqondo wokuthi kungcono kube khona ekwenzayo kunokubhuquza ekhaya.
“Wafika kanjalo umbono webhizinisi. Ngacela umngani wami uThabiso Mkhize ukuthi angisize (onamava okusebenza ezindaweni zokudla ezihlukene) abenguweta futhi uyakwazi ukusiza amakhasimende nokwenza okunye okudingeka endaweni yokudlela,” kusho yena.
Uthi ukubawu-chef wakufundela e-University of Johannesburg, nokho akaziphothulanga izifundo ngenxa yezizathu angathandi ukuxoxa ngazo.
UMhlongo uthi izingqinamba abhekene nazo ebhizinisini wukudayisa, okuyikona okubalulekile ngoba uma ungadayisanga awukwazi ukwenza okunye.
“Sisaqala ukudayisa kwakunzima ngoba kwakufanele sikhiphe ephaketheni senze okufanele sikwenze. Sasingakwazi ukuthenga yonke into esiyidingayo ngesikhathi esisodwa, okunye kwakubuye kunganeli,” kukhumbula yena.
Kuleli bhizinisi uthi benza izinto ezingajwayelekile emabhizinisini asemalokishini njenge-pizza, ama-taco nama-ribs ngendlela abanikazi baloku kudla abakwenza ngayo. Isibonelo nje i-pizza yabo yenziwa emlilweni njengoba yenziwa ngamaNtaliyane.
Amanani ama-pizza abo amancane awuR45 kuya kuR50, aphakathi nendawo awuR75 kuya kuR80 kuthi amakhulu abe wuR105 kuya kuR120.
“Sidayisa ukudla okungajwayelekile kanti akubizi kakhulu. Sikwazi ukukuhlanganisa kubengama-combo, akuyiwona abawathanda kakhulu abantu, sibahlanganisele izinto ezihlukene abangeke bakwazi ukuthenga kwezinye izindawo.
“Enye into ehlukile ngathi wukuthi yonke into siyiqala phansi. Asiyithengi inhlama, ngiyixova mina, ngiyenze ibeyindilinga, i-sauce siyenza thina nokuthi isitofu sethu akusona esikagesi kodwa siyabasa ukuze ukudla kwethu kwenziwe ngendlela yasendulo,” kusho yena.
Uthe ngesikhathi beqala ibhizinisi babebathathu kodwa omunye umlingani wabo waphelelwa wumdlandla endleleni, wasala noMkhize. Sebeqashe izisebenzi ezimbili eziyitoho.
Eluleka abanye osomabhizinisi uthe, uma benento abakwazi ukuyenza, ababona ukuthi bayayenzisisa kufanele bazithembe futhi bazimisele ngomsebenzi wabo.
“Ngiye ngibone ukuthi abantu babuye bageje ngokuthi ukuzisebenza bangakuthathi njengomsebenzi wabo. Kufanele bawuhloniphe bazitshele ukuthi njalo bazokhuphula izinga, nathi isandla sethu sasingafani eminyakeni emibili sisaqala ukusebenza. Uma uqhathanisa umsebenzi wethu ngesikhathi siqala nowamanje, uyawubona umehluko ngoba njalo sifuna ukwenza kangcono. Selize lasimama ibhizinisi,” kusho uMhlongo.
UMhlongo ufisa ukuthi babenamagatsha ezindaweni ezinkulu eKZN bagcine sebefinyelela naseGoli.
“Uma seseifike eGoli, siyobe sesikwazi ukufinyelela kwezinye izindawo eziningi zaseNingizimu Afrika,” kusho yena.
Facebook: The People’s Fire House
Instagram: People’s Fire House
TikTok: The People’s Fire House