Kuhlomule kakhulu ezemfundo, ezempilo nezenhlalakahle kwiSabelomali saseKZN esiwuR158.4 billion
WUBONISWA MOHALE
KUYINKINGA ukwaba imali KwaZulu-Natali ngenxa yokuthi ayiyiningi imali engena kulesi sifundazwe.
Usho kanje ungqongqoshe womNyango weziMali KwaZulu-Natali uMnu uFrancois Rodgers ngenkathi ethula iSabelomali namhlanje.
U-Rodgers ubeke phambili ezemfundo, ezempilo nezenhlalakahle kwiSabelomali sakhe esiwuR158.478 billion.
UmNyango wezeMfundo wabelwe uR66.7bn, ezempilo zanikwa uR56.2bn kwathi ezenhlalakahle zathola uR3 613 297 bn. Uthe le minyango uyinike imali eningi ngoba yiyona esondele kakhulu kubantu futhi okufanele isheshise ukulungisa izinselelo ezihlukene enazo.
Phakathi kwazo ubalule ukuqashwa kwabasebenzi nokuqinisekisa ukuthi izikhungo zayo zisesimeni esifanele.
“Sibeke uR278.085 million, uR356.771m noR468.391m eminyakeni emithathu ezayo ozobhekelela izimo ezizoqhamuka singazihlelelanga. Imali eningi siyabele ezemfundo, ezempilo nezenhlalakahle ngoba sifuna abantu abangenamshwalense wempilo baqhubeke nokuthola usizo olufanele. Sifuna izingane zithole imfundo esezingeni bese abadala nabancane abalekelwa ezenhlalakahle bathole usizo olufanele ngaso sonke isikhathi,” kusho yena.
FUNDA LAPHA: https://www.umbele.co.za/2024/11/28/uqinisa-isandla-ngezimali-uhulumeni-wasekzn/
Uthe ikhona nemali yokusiza umNyango wezeMfundo ukuthi uqashe abasizi bothisha unyaka owodwa evela ohlelweni lukamengameli i-Presidential Youth Employment Initiative.
Uthe babeke nemali yokulungisa imigwaqo nenye ingqalasizinda ekhona ewuR10.106bn. Kule mali uR3. 577bn uzolungisa ingqalasizinda ekhona edinga ukunakekelwa, uR3.829bn uyivuselele bese uR2.7bn kube owokuyiphucula.
Ukhale ngezinga lokuntula eliphezulu KwaZulu-Natal, wathi abantu abawu-4.248m bakulesi sifundazwe baphila ngezibonelelo zikahulumeni kanti negebe lokungalingani phakathi kwabampofu nabanemali liyaqhubeka nokwanda.
Ubonge umNyango weMfundo ngokunyusa izinga labantu abafundile njengoba u-90% wabantu abaneminyaka engaphezu kwewu-15 bekwazi ukufunda ngokuqonda abakufundayo.
Eminye iminyango yabelwe kanje:
| OwokuThutha | R13 827 066bn |
| OwokuThuthukisa umNotho, ukuVakasha neMvelo | R3 606 998bn |
| OwokuHlalisa abaNtu | R3 549 877bn |
| OwoLimo nezasemaKhaya | R2 757 443bn |
| OwemiSebenzi yomPhakathi | R2 037 490bn |
| OwokuBusa ngokuBambisana nezoMdabu | R1 931 153bn |
| OwemiDlalo, ubuCiko namaSiko | R1 598 141bn |
| IsiShayamthetho | R850 796m |
| IHhovisi likaNdunankulu | R817 875m |
| OweziMali | R710 190m |
| OwokuPhepha komPhakathi nokuXhumana | R275 716m |