Inkantolo ivune umqoqintela kwelikaMaMkhize
INTATHELI YOMBELE
INKANTOLO isichithile isicelo seShandi Trust, eyengamele izimpahla zikasomabhizinisi waseThekwini uNksz uShauwn Mkhize, okubalwa kuzona neqembu lakhe lebhola iRoyal AM.
I-Shandi Trust ibifake isicelo esiphuthumayo eNkantolo yaseMgungundlovu mhlaka-29 Januwari, ifuna ukubhalelwa incwadi ezochazela iNational Soccer League (iNSL) ukuthi izokwazi ukudlala imidlalo yayo esele.
I-SARS ayizange iyibhale leyo ncwadi njengoba iqhubeka namalungiselelo okuqoqa intela eyikweletwa yizinkampani zikaNksz uMkhize.
NgoMeyi nangoNovemba wonyaka odlule izinkantolo zaseMgungundlovu neyaseThekwini zagunyaza iSARS ukuthi ishaqe izimpahla zeShandi Trust eziwu-23, okubalwa neye-Royal AM.
I-Shandi Trust ike yafaka isicelo sokuthi kudedelwe izimpahla zayo kodwa ngesonto elidlule iNkantolo eNkulu yaseMgungundlovu neyaseGauteng zisichithile lesi sicelo.
Izindaba zeShandi Trust namabhizinisi angaphansi kwayo zibesezifakwa ngaphansi komlawuli.
Esitatimendeni sabezindaba iSars iveze ukuthi umlawuli wabanomhlangano nabeRoyal AM ngonyaka odlule, udaba lwaze lwadluliselwa kwiNSL ukuze nayo ichazelwe ngesimo sezimali saleli qembu lebhola.
Loku kuholele ekutheni mhlaka-22 Januwari, iNSL imise yonke imidlalo yeRoyal AM enenkinga yezimali.
Mhlaka-29 Januwari iRoyal AM ihambise udaba enkantolo ibopha umlawuli, iSARS neNSL. Ibikhala ngokuthi ukungaphumi kwencwadi eshoyo ukuthi izokwazi ukubhekana nezindleko zayo akukho semthethweni. Ibifuna nokuthi inkantolo iphoqe iNSL ukuba iyivumele ukudlala imidlalo yayo esele.
Udaba lulalelwe mhlaka-5 Febhuwari, lwachithwa kwathiwa iRoyal AM kufanele ikhokhe zonke izindleko.
Inkantolo ithe aluphuthumi lolu daba. I-Sars ithe vele akukho okuphuthumayo ngoba iRoyal AM yachazelwa zonke izizathu eziyenza ibesesimweni esibi sezimali.
Ithe abaphathi beShandi Trust bayazi ngakho konke okwenzekayo, kwazise umlawuli wabachazela.
Ukhomishana weSARS uMnu Edward Kieswetter uthe bayajabula ngesinqumo senkantolo echithe lesi sicelo ngoba ibona ukuthi asiphuthumi.
“Bonke abakhokhintela banesibopho sokuqinisekisa ukuthi intela ikhokhwa ngesikhathi futhi baqinisekise ukuthi izindaba zabo zentela zisesimweni esifanele. Kuyadida ukuthi abakhokhintela banomdlandla wokugijimela enkantolo kodwa bebebehluleka wukufaka umfutho ofanayo ezindabeni zabo zentela.
“I-Sars isebenzisana nezinhlaka zomthetho ukuqinisekisa ukuthi bonke abakhokhintela bakhokha intela yabo ngaphandle kwezihibe. Sizibophezele ukuqinisekisa ukuthi silandela umthetho uma silandelela intela esiza izwe ukuthi likhokhe izimpesheni, lakhe izikole, libenemali yezempilo nezinye izidingo,” kusho yena.