Luyaqhubeka nokudala amathuba omsebenzi uhlelo lokwakha ifenisha
WUNONDODUZO NGCONGO
IPHINI likangqongqoshe womNyango weMfundo ePhakeme lihole ithimba ebelivakashele eMkhumbane Entrepreneurship Support Centre eCato Manor, eThekwini, KwaZulu-Natali, basanda kuhlola ukuqhubeka kohlelo i-Furniture-manufacturing and Upholstery Skills Development Training Programme.
Iphini likangqongqoshe uDkt uMimmy Gondwe belihamba nekhansela lakuWadi 29 uMnu uBhekisisa Mngadi nesikhulu esiphezulu se-Fibre-processing and Manufacturing Sector Education and Training Authority (iFP&MSETA) uDkt Felleng Yende mhlaka-29 Novemba.
Inhloso yalolu hambo bekuwukuhlola umphumela walolu hlelo oluhlinzeka ngamakhono abalulekile emkhakheni wokukhiqiza ifenisha. Ngemva kokuhlola lesi sikhungo, uDkt uGondwe lihlabeke umxhwele ngefenisha enhle futhi esezingeni eliphezulu eyenziwe ngabafundi abawu-60 abakulolu hlelo.
“Engikubone namhlanje kuhle ngendlela eyisimanga futhi kuyakhuthaza. Ngemva kokuzwa engikuxoxelwe ngabantu abakulolu hlelo, ngingasho kugcwale umlomo ukuthi ukuthuthukisa amakhono yiyonanto enkulu ekwakhiweni kwamathuba omsebenzi nokuqeda ububha emiphakathini,” kuphawula yena.
UDkt uGondwe nekhansela likaWadi 29 uMnu uBhekisisa Mngadi bebheka omunye wemisebenzi yabantu abasohlelweni i-Furniture-making Skills Development Programme
Ugcizelele ukubaluleka kokusebenza ngokubambisana, wacela izinkampani ezizimele ukuthi ziseke lolu hlelo. “Ngiyathanda ukubona abantu besifazane bethuthukiswa, ikakhulu abantu besifazane abasebasha. Okungijabulisa kakhulu ngalolu hlelo wukuthi iningi labakulona ngabantu besifazane abahamba phambili kulo mkhakha obekugcwele kuwo abesilisa,” kusho uDkt uGondwe.
Lolu hlelo oselusonyakeni wesithupha seluqeqeshe abantu abangaphezu kuka-150, iningi labo okuyintsha nabantu besifazane. Kubona, cishe amaphesenti awu-70 aseqale amabhizinisi awo aqasha cishe abantu abathathu. Omunye wabantu asebephumelele wuNksz uMatho Mathenjwa, owasungula iFeel in Heaven Design.
Ngemva kokuxhaswa ohlelweni lukahulumeni wesifundazwe i-Operation Vula Programme, kwathi uNksz uMathenjwa esephothule ukuqeqeshwa, wakhulisa ibhizinisi lakhe kanti manje useqashe abantu abangaphezu kweshumi.
Uthi uyabonga ngalolu sizo olumsize ukukhulisa ibhizinisi lakhe. “Ngithole uR200 000 ongisize ngaqala ibhizinisi lami, ngalikhulisa laze lafika lapho likhona namhlanje,” kusho yena.
UMnu Mngadi uncome lolu hlelo wathi luhambisana nenhloso kaMasipala waseThekwini yokufukula imiphakathi ngokuyisiza ukuthi iqale amabhizinisi.
Kulo nyaka, lolu hlelo luqeqesha abantu abasha abawu-60, abawu-30 babo abaphothula izifundo zezinyanga ezintathu nabawu-30 abasohlelweni lonyaka owodwa lokufundela umsebenzi.
Lolu hlelo, olwenziwa ngokubambisana wuPhiko lokuSeka amaBhizinisi lukaMasipala waseThekwini, iFP&MSETA, neMy Space Academy, lukhuthaza ukwakhiwa kwamathuba omsebenzi namathuba okuzisebenza.