Umasipala wethule izinhlelo zokuphepha ngamaholidi asehlobo
WUGUGU MDLALOSE
ITHEKU livuliwe futhi lisaloku liyindawo yokuzijabulisa ewungqaphambili e-Afrika.
Lo myalezo ugcizelelwe yiMeya uMnu Cyril Xaba ngenkathi yethula uhlelo lukaMasipala waseThekwini lokwengamela amaholidi kaKhisimusi e-uShaka Marine World.
Njengoba izivakashi ezizodla amaholidi seziqalile ukutheleka eThekwini, umasipala usuhlele uchungechunge lwemicimbi nezinye izinhlelo zokuzijabulisa ezihambisana namabhishi awo ahlanzekile, izindawo zobumnandi zasebusuku, amagugu namasiko aseThekwini anothile.
Njengengxenye yokuqinisekisa amaholidi aphephile izivakashi ezingasoze zawakhohlwa, uXaba uthe amaPhoyisa kamasipala asebenzisana nezinhlaka zomthetho ezihlukene okubalwa kuzona iSouth African Police Service, iRoad Traffic Inspectorate nezinkampani zonogada ezizimele ukuze abomthetho bahlale bebonakala beqaphile kuzo zonke izindawo zokuvakasha nezindawo esezihlonzwe njengezizinda zobugebengu.
Loku kusebenzisana okuphakathi kukamasipala nabalingani bezokuvakasha abazimele kusekwa yithimba iPresidential eThekwini Working Group.
Imeya ithe ukuphepha emgwaqweni kuyingxenye ebalulekile yokuqinisekisa amaholidi anokuthula nenjabulo.
“Amaphoyisa ethu azobhekana nabashayela bephuzile nabaziphatha budedengu emigwaqweni. Imikhankaso yokuqinisekisa ukugcinwa komthetho, okubalwa kuyo nezivimbamgwaqo, izoqhutshwa kulo lonke iTheku ukuze kuliwe nazo zonke izinhlobo zobugebengu. Ukungena kwezimoto kuzolawulwa emigwaqweni ethile eholela ebhishi. Indawo esetshenziselwa ukupaka bese ugibela ibhasi nayo izobe ivuliwe. Le ndawo imahhala futhi izinto zokuthutha zihamba njalo ngemizuzu ewu-30 ngesikhathi samaholidi,” kusho yena.
Njengengxenye yokuqinisa ezokuphepha, kuzotshalwa amaPhoyisa kaMasipala amasha asanda kuqeqeshwa awu-500 ukuze asize ukuqinisekisa ukuthi amaphoyisa ahlale ebonakala emigwaqweni nasemphakathini. Loku kulandela ukuthi umasipala usanda kuthenga izimoto zamaPhoyisa kamasipala ezingaphezu kweziwu-170.
UXaba uthe amanye amaphoyisa azobe esebenza egibele amahhashi namabhayisikili ezindaweni ezihlukene zokuvakasha elekelelwe nangamakhamera e-CCTV.
Mayelana nezokuphepha emabhishi, ukuze izingane zitholakale kalula, umasipala usuthenge amabhande afakwa engalweni awu-200 000 wagxumeka namatende ayisikhombisa emabhishi ukuze kuhlaliswe izingane ezidukelene nabazali kuwona. Kuhlelwe nendawo lezi zingane ezingalaliswa kuyona.
“Ngaphezu kwaloko, umasipala usuyayiphothula nenqubo yokuqasha abasebenzi bangamaholidi abawu-540 abazotshalwa ezindaweni zokuvakasha ezihlukene. Lapha kubalwa abacosha udoti abawu-135 nabazosiza izivakashi emabhishi ehlukene abawu-104. Kuzotshalwa nezisebenzi ezisiza ezindaweni zokubhukuda eziwu-105 ukuze zisize ukuqinisekisa ukuphepha kwababhukudayo,” kwengeza yena.
Uthe umasipala uzoqhubeka nokuqapha futhi uhlole izinga lokuhlanzeka kwamabhishi masonto onke, wagcizelela ukuthi umasipala unezindawo zokubhukuda ezingaphezu kweziwu-40 ezindaweni ezihlukene.
“Asikungabazi ukuthi isikhathi samaholidi kulo Disemba sizoba mnandi futhi siqinisekisa izivakashi zethu ukuthi ngaphandle kwamabhishi, sinenqwaba yezinye izindawo ezihehayo eziseThekwini,” kuphetha uXaba.
Isimo sokuhlanzeka kwamanzi emabhishi singabhekwa ku-www.durban.gov.za/BeachStatus