Izinguquko endleleni iStats SA ehlaziya ngayo ukwenza kwabathengi
YINTATHELI YOMBELE
I-STATISTICS South Africa (iStats SA) izoshintsha indlela exuba ngayo izimpahla ebheka amanani azo ezisetshenziswa ukubheka ukuthi amandla emali ehla noma akhuphuka kangakanani ezweni.
Ekuqaleni kwesonto iStats SA imemezele ukuthi ukwehla kwamandla emali kubewu-4.6% ngoJulayi, kusuka ku-5.1% ngoJuni. Kuleso simemezelo lesi sikhungo sithe kusukela ngonyaka ozayo kuzoguqulwa indlela okuhlanganiswa izimpahla ngayo ukuhlola indlela okuthengwa ngayo ubuchwepheshe obusha.
Kwezinye izindaba, uphiko olungaphansi kweNhlangano yeZizwe, i-United Nations Statistics Division lushintshe indlela okuhlanganiswa izimpahla ngayo ukubheka indlela abathengi abasebenzisa imali ngayo, iCOICOP 18.
Le-COICOP esetshenziswa yiStats SA yayihlanganiswe ngo-1999 kanti yaqala ukusetshenziswa eNingizimu Afrika ngo-2008.
I-Stats SA ithe ushintsho olukhulu wukuthi izinto ezithinta ukuhlinzeka ngemali sezizozimela njengoba kuzokwethulwa i-Insurance and Financial Services Category, okumanje ziyingxenye ye-Miscellaneous Goods and Services Category.
Ziningi nezinye izimpahla esezifakwe kwezinye izindawo kanti iStats SA ithe izokhipha imininingwane ethe xaxa uma sekusondele isikhathi.
Khonamanjalo, umNyango wezeziMali uzoba nesigcawu sesithathu esizodingida izindlela zokuthi wonke umuntu abambe iqhaza emnothweni, iSouthern Africa Towards Inclusive Economic Development (i-SA-TIED).
Ingqikithi yalesi sigcawu ithi “Indlela ephusile yokuqoqa intela: Ukukhuphula imali engenayo nokunciphisa ukungalingani eNingizimu Afrika.” Lesi sigcawu, esizoba mhlaka-30 ngo-Agasti, sizogxila ekuphuculeni indlela okuqoqwa intela ngayo nokuyaba.
Ezinye zezikhulumi kuzoba yinhloko ebambile ye-Tax and Financial Sector Policy emNyangweni wezeziMali uMnu uChristopher Axelson obambe, iphini likakhomishana weSouth African Revenue Service uMnu uJohnstone Makhubu nomxazululi wemibango yentela iTax Ombud uNks uYanga Mputa.
- Imininingwane icashunwe kwiStats SA nasemNyangweni weziMali