Kuleli sonto kuSAZIWAYO NEMALI sixoxa no-Omega Mncube, umlingisi wemidlalo yethelevishini. Uselingise emidlalweni okubalwa kuyo Uzalo, eHostela, Umkhokha neRed Tape

Usemncane wawuphiwa yini imali?

Yebo, ngangiphiwa eyokuphatha esikoleni.

Uqale nini ukuba ne-akhawunti yasebhange futhi wayivula kuliphi?

Ngiqale ngo-2013, ngayivula eCapitec.

Ekukhuleni kwakho, yini oyikhumbulayo nowayifunda ngemali?

Wukuthi imali iyasetshenzelwa ukuze ube nayo. 

Uqale nini ukusebenza kanti kwakuyimalini umholo wakho wokuqala?

Ngiqale ngo-2019 ngilingisa kuZalo, ngihola uR1 500 ngosuku kubuye kube ngaphezulu noma ngaphansi kwalokho. Kwakuncika ekutheni ungakanani umsebenzi.

Wawenzani umholo wakho wokuqala?

Ngawuyisa ekhaya ukuyobonga ngomsebenzi engangiwutholile, esalayo ngathenga ngayo izintwanyana zokuzijabulisa.

Yini into enhle ongathi usuke wayenza ngemali?

Wukondla nokunakekela ingane yami. 

Yiliphi iphutha elithinta imali osuke walenza?

Wukusebenzisa imali ngokweqile, ngigcina ngiyimosha ezintweni engingazidingi.

Wake walutheka mhlawumbe ngokungena ebhanoyini?

Cha, ngiyazisaba izinto ezifana nalezo.

Yisiphi iseluleko esihle owasithola ngemali?

Wukuthi kubalulekile ukonga imali nokuyisebenzisa ezintweni ezibalulekile. 

Uma ungawina uR1 million kwiLotto ungawusebenzisa kanjani?

Ngingaqala ekhaya ngiyobonga bese ngithenga indawo yokwakha izindlu eziqashisayo, kuthi esalayo ngithenge ngayo imoto noma umuzi.

Ungabeluleka uthini abanye abasemkhakheni wakho ngokuphatha imali?

Wukuthi uma usenemali, kumele uyisebenzise ezintweni ozidingayo, ugweme ukwenza izinto ezingenasidingo ngoba ufuna ukujabulisa abanye abantu.