Izinguquko ezisanda kwethulwa kwiKhabhinethi yaseKZN zilethe ushintsho emNyangweni wezoLimo njengoba kuqokwe ungqongqoshe omusha uMnu uSuper Zuma. UZuma uneminyaka eyilungu lesiShayamthetho kanti wake wawunobhala we-ANC esifundazweni. Umbele ubuze abalimi ukuthi yini abafisa uZuma ayibeke eqhulwini

Nazi ezinye zeziphakamiso abazibekile:  

UMnu uMthokozisi Goba uthe: “Akashintshe indlela uphiko lokuthenga izimpahla olusebenza ngayo kungabi yiCedara eyenza yonke into, kwenziwe yizifunda.” 

UNks uZinhle Msomi uthe: “Akeze kithina kuzo zonke izifunda eKZN.” 

UMnu uZamokwakhe Mbuyisa uthe: “Sifundile, sisebenzile emapulazini kodwa ave kunzima ukuqala amabhizinisi. Uma engasondela kithi kube nezingxoxo ezwe ukuthi yini esemiqondweni yethu, mhlawumbe loko kungamsiza naye, ngeke azisole.”

UMnu uBongani Mtshali uthe: “Amapitsi kubalimi abasafufusa ukuze bathuthuke ngoba kunenkinga yamanzi.” 

UMnu uNdumiso Hlabe uthe: “Akayeke insangu ilinywe, kwenziwe inzuzo nocwaningo lokwelapha ngayo. Akabeke umthetho oqinile wokuthi kuboshwe futhi kuphucwe abantu abangawusebenzisi umhlaba, aqede inkohlakalo.” 

UMnu uMbongeleni Ntshangase uthe: “Ngikushayela ihlombe kakhulu ukuqokwa kukaNxamalala noNkk uBongi uSithole-Moloi, isifundazwe sethu sinenhlanhla ngokubekwa  kwabantu abazokhuphula umnotho esinawo. Siyalima ezindaweni zamakhosi angobabamkhulu. Bobabili abakhe uhlaka lwabalimi ezindaweni zasemakhaya basebenzise abalimi abazoqasha omahlalela ezindaweni zabo kuye ngokukhula kugcine emapulazini. Abeze kithi sizobatshela sihleleni, bangasifuqi abakucabangayo.” 

UMnu uLungisani Memela uthe: “Mina ngifisa ama-learnership angabandlululi ngokweminyaka. Bahlele izimakethe komasipala ukuze sihambise umkhiqizo wethu khona, kuvulwe amadela azokwenza kube lula kubafuyi.”

UNksz uNokuthula Ndlovu uthe: “Ayashesha ukuphelelwa yisikhathi ama-voucher ePESI umuntu esazama izinto zokuthutha, lezi zindawo zikude nabalimi. (Sidinga) nezinhlelo zokuthi abalimi baxhaswe ngemfuyo nezithombo ukuze baqale.”

UMnu uBonga Mdlovu uthe: “Siyabonga. Mhlawumbe uzoletha ushintsho ngoba bekuphuma izimali kuthiwa zixhasa izinkampani zabantu besifazane, intsha nabakhubazekile kodwa bezigcina zingafikanga kubo. Ngingomunye okwathiwa kulahleke imininingwane yakhe kabili kodwa imali yatholwa abantu abangafuyile futhi abangalimile, abagcina sebedayisela thina loku kudla. Ngaze ngaya kabili enkosini ngafika ngakhipha imali yencwadi ehambisana namafomu.”

UMnu uSimphiwe Jali uthe: “Ake baphume amahhovisi bahambele iziyingi babuke ukuthi kuyasetshenzwa yini. Kuyihlazo ukubona emahhovisi ezolimo ogandaganda namageja besesikhotheni ngenxa yokungasetshenziswa.” 

UMnu uMxolisi Stanford uthe: “(Ngifisa ukubona) ukuxhasa abalimi abasafufusa ngembewu, umanyolo ofanele nezinsizakusebenza.” 

UMnu uThembela Nyembe uthe: “(UZuma) asizame ngembewu nokusibiyela ngoba sikhula ngokusebenza nendawo sinayo, siyayisebenza kodwa sihlushwa yimfuyo.”