Intshisekelo yokuqala ibhizinisi imshiyise umsebenzi enkampanini enkulu onesimonyo esenza izinto ezehlukene. Uxoxe noZIMBILI MAZIBUKO

UKHETHE ukushiya umsebenzi awufundele ukuze aziqalele ibhizinisi lamafutha okugcoba ikhanda nomzimba. Kakade uvela emndenini wabantu abebedayisa njengoba kwakune-bottle store nebhusha kubo.

UNksz uWandisa Nkosi, odabuka eNewcastle, KwaZulu-Natali, uwumsunguli weJust Shea Butter.

Une-Honours in Property Studies yase-University of Cape Town. Ngemva kwayo, wengeza nge-Master’s in International Housing Development e-England, ngaphambi kokubuyela eNingizimu Afrika ukuzosebenza kwenye yezinkampani ezinkulu eGoli.

Ngemva kwesikhashana, unqume ukushiya umsebenzi wakhe ukuze aqhubeke nebhizinisi lakhe lamafutha okugcoba abesevele elenza eceleni ngezimpelasonto. 

“Ngiqale ngokungena kwi-internet ngifunde ngamafutha okugcoba izinwele zabantu abamnyama. Ucwaningo engangilwenza lwangithatha lwangibeka kubantu baseMelika abangosaziwayo kuYouTube nababekhuluma ngala mafutha. Yilapho ngafuna ulwazi ngayo ngoba ngesikhathi ngifunda eNgilandi ngabona kwesinye isitolo benendawo enkulu abebebeke kuyona okokugcoba izinwele ezimnyama, nokuyinto esingayiboni lapha eNingizimu Afrika. Isikhathi esiningi uma ungena ezitolo zakuleli, ufica ishalofu elincane elinezinto zokugcoba zabantu abamnyama. Bagcwalisa kakhulu ezokugcoba izinwele zezinye izinhlanga,” kusho yena. 

I-Just Shea Butter ithambisa isikhumba, izinwele, isiza abanenkinga yesikhumba esomile, iqede ukutshabulwa yinabukeni ebantwaneni nokunye.

I-Just Shea Butter ihlanganiswa bese ifakwa ezitsheni eThekwini, lapho esezinze khona. 

“Ngesikhathi ngiyeka emsebenzini, ngasebenzisa cishe imali engangoR50 000 engabe ngizibekele yona ukuze ngiqale leli bhizinisi. Kwadingeka ngifunde ngokufakwa komkhiqizo wami ezindishini ezincane ukuze ubukeke kahle kubathengi futhi udayiseke kahle.

“Kwadingeka ukuthi ngakhe kahle igama lomkhiqizo wami ezinkundleni zokuxhumana (futhi) ngiqinisekise ukwethembeka emakhasimendeni ami ngoba esikhathini samanje akukho lula ukuthi abantu bakwethembe, ikakhulukazi uma ibhizinisi bekwazi ukulithola ezinkundleni zokuxhumana. Kubalulekile ukuthi uma unebhizinisi ube neqiniso kubantu futhi ubanikeze ulwazi abaludingayo ngomkhiqizo owudayisayo,” kusho yena.

UNksz uNkosi uthi yize esesebenze kanzima ukwakha ibhizinisi lakhe, ngeke akhohlwe wusizo aluthole kwiSAB Tholoana nakwi-Agri Business Development Agency njengoba bamxhasa ebhizinisini lakhe yena nabanye osomabhizinisi besifazane abasebancane.

“Ngiqala nje ibhizinisi ngafuna ulwazi ngezindlela uhulumeni axhasa ngayo intsha. Ngabona ngiwumuntu osethubeni elihle lokuhlomula ngenxa yeminyaka yami ebingivumela, nokuba owesifazane omncane obesevele enebhizinisi aseliqalile. Ngafaka isicelo, ngaba nenhlanhla yokuphendulwa, ngaxhaswa. Loko nje kukodwa kuyangijabulisa futhi kwenze omkhulu umehluko ngoba senginayo nemishini yami yokusebenza,” kusho uNksz uNkosi. 

I-Just Shea Butter itholakala ngesitsha esiwu 250g esibiza uR165 kanti iyatholakala kwi-website yebhizinisi noma ezinkundleni zokuxhumana zebhizinisi.

UNksz uNkosi ufisa ukwandisa izisebenzi zeJust Shea Butter, njengoba okwamanje eqashe umuntu oyedwa, nokuthi ibhizinisi lakhe libe ne-warehouse enkulu okuzosebenza kuyona abantu besifazane. 

Facebook: Just Shea Butter 

Instagram: justsheabutter

YouTube: Just Shea Butter

•  Umbele unesivumelwano noLindo Makhaye weLusizo, owenza uhlelo Notha Ujule Ngolwazi kuKhozi FM. Osomabhizinisi esibhala ngabo ngamabhizinisi abo engosini Asafufusa kungenzeka kukhulunywe ngawo kulolu hlelo