Umnotho wehle ngo-0,2% ngekota yesibili – iStats SA
YINTATHELI YOMBELE
UMNOTHO waseNingizimu Afrika wehle ngo-0,2% ngekota yesibili yalo nyaka, ngemva kokukhula amakota ayisithupha elandelana.
Lokhu kuvezwe yiStatistics South Africa (iStats SA) embikweni wayo okhishwe ngoLwesibili, okhombisa ukuthi ukwehla komkhiqizo ezimayini, ezohwebo nezokukhiqiza kubenomphumela omkhulu ekusebenzeni komnotho phakathi kwango-Ephreli nangoJuni.
Umsebenzi wezimayini wehle ngo-3,0%, ikakhulu ngenxa yokuncipha kokukhiqiza iqoqo lezinsimbi ze-platinum, i-manganese ore, igolide nensimbi. Ezohwebo zehle ngo-1,9% ngemva kokunyuka amakota ayisithupha elandelana.
Ukwehla kwalo mkhakha kudalwe wukungahambi kahle kwezohwebo ezidayisa ngobuningi, izimoto nezimboni zokudla neziphuzo. Imboni yezokukhiqiza iqhubekile nokuntenga, yehla ngo-1,8%, okubewukwehla kwayo okwesithathu kulandelana.
Imikhakha eyisikhombisa kweyishumi yehlile. Ukudla neziphuzo, ifenisha nezinye izinto zokukhiqiza nezinto zensimbi kuphakathi kwemikhakha edonse kanzima ngokwehla.
FUNDA NALAPHA: https://www.umbele.co.za/2026/09/10/akusukunyelwe-indaba-yokukhula-kancane-komnotho-icosatu/
Nokho, akuzona zonke izimboni ezibe nenkinga. Ezokuthutha nezokuxhumana zinyuke ngo-0,9%, ikakhulu ngenxa yokwanda kwezokuthutha emigwaqweni. Ezokwakha zinyuke ikota yesibili ilandelana kanti ezolimo ziqhubekile nokukhula, okube ukukhula kwazo kwesikhombisa kulandelana.
Imindeni isebenzise imali eningi ngekota yesibili, ukuyisebenzisa kunyuke ngo-0,4%. Imali eningi isetshenziswe ekudleni naseziphuzweni ezingenatshwala, ugwayi nasezindaweni zokudlela nasemahhotela.
Izimpahla ezingena ezweni zinyuke ngo-4,9%, ikakhulu imishini nezinto zikagesi nemikhiqizo embiwayo.
Ukudayisa izimpahla kwamanye amazwe kunyuke ngo-0,9%, ikakhulu ngenxa yokwanda kwama-pearls, amatshe ayigugu nezinye izinsimbi eziyigugu.
Ukutshala imali kwehle ngekota yesibili kulandelana, ikakhulu ngenxa yokwehla kokutshala imali emisebenzini yokwakha nasezintweni zokuthutha.
Izinkampani zikahulumeni namabhizinisi azimele zehlise ukutshala imali kanti uhulumeni wandise imali oyitshale ezimpahleni nasekwakheni ingqalasizinda.
I-Stats SA ithi ukwanda kwezimpahla ezingena ezweni nokuntenga kokutshala imali kubengenye yezinto ezibenomphumela ekwehleni komnotho ngekota yesibili.