UMasipala waseThekwini uheha abatshalimali baseChina
YINTATHELI KAMASIPALA
IMEYA kaMasipala waseThekwini uMnu uCyril Xaba ihlangene nosomabhizinisi baseChina nabaseThekwini ngenhloso yokuqinisa ubudlelwano nabo nokubagqugquzela ukuthi baqhubeke nokutshala imali kuleli dolobha.
Lo mhlangano ubuse-Inkosi Albert Luthuli International Convention Centre ngoLwesithathu, ngaphansi kwendikimba ethi “Creating a conducive environment for business growth through a robust transport and logistics sector”, okusho ukudala indawo elungele ukukhula kwamabhizinisi ngemboni yezokuthutha enamandla.
Lo mhlangano ubuhlose ukubonisa amathuba amasha osomabhizinisi abangatshala imali kuwona. Okunye bekuwukunika osomabhizinisi ithuba lokuza nezisombululo ezinqinda ukukhula komnotho waseThekwini.
FUNDA NALAPHA: https://www.umbele.co.za/2025/08/29/umasipala-wasethekwini-uheha-abahleli-bemicimbi-ukusimamisa-umnotho/
UXaba uthe ezinyangeni ezidlule bekunamathimba ahlukene asuke eThekwini avakashela eChina ngenhloso yokuqinisa ubudlelwano bomnotho.
“Ngenyanga edlule bengihola ithimba ebeliye emadolobheni ahlukene aseChina ngenhloso yokuqinisekisa ukuthi kuyaziwa ukuthi eThekwini siyabamukela abatshalimali.
“Sifuna ukusebenzisana nosomabhizinisi baseChina ezinhlelweni ezibalulekile zokufukula umnotho singahlanganiswa nje wukuthi baletha izimpahla echwebeni lethu kodwa siqinisekise ukuthi ezokuthutha zihamba kahle. Sifuna ukubambisana nasekukhiqizeni imikhiqizo ehlukene, sibambisane ekufukuleni ezobuchwepheshe nasekwakheni ubuchwepheshe obungayilimazi imvelo,” kusho yena.
Inxusa laseChina eThekwini uMnu uLi Zhigong lichaze idolobha laseThekwini njengelinamathuba nomdlandla odingwa wosomabhizinisi.
Lithe izinkampani zaseChina ezitshale imali eNingizimu Afrika ziqinisekisa ukuthi zidala amathuba omsebenzi, ziphucule ingqalasizinda nenhlalakahle yabantu.
“I-China izibophezele ukuthi izovula imakethe yayo futhi ilethe namathuba azosimamisa i-Afrika. Umthetho wethu omusha wokuthi izimpahla ezivela e-Afrika eziyodayisa eChina zingayikhokhi intela ukhombisa ukuthi sizimisele ngokuqinisa ubudlelwano bethu namazwe ase-Afrika. Uzosiza nosomabhizinisi baseNingizimu Afrika ukuthi bangene kalula emakethe yaseChina,” kusho yena.
Usihlalo weKomiti lokuThuthukisa umNotho nokuHlela kumasipala uMnu uThembo Ntuli uthe leli dolobha likulungele ukusebenzisana nemboni ezimele nokuqinisekisa ukuthi abatshalimali bakhetha lona ngaso sonke isikhathi.