‘Imali iphathiswa okwezikhali zamaNtungwa’

Kuleli sonto kuSAZIWAYO NEMALI sikuphathele uThokozani Zulu, odume ngelika‘Tzozo’. Uwumculi wekwaito wodumo lwengoma ethi Woza eDurban eyaphuma, nethi Amantombazane ayicula noProfessor nosihlalo waseKZN weCultural and Creative Industries Federation of South Africa. Useke wasebenza nabaculi abaningi okubalwa kubo uProfessor, uDJ Tira, iTrompies, uZakwe, uLvovo, neBig NUZ

WUTHOBILE ZWANE

Usemncane wawuphiwa yini imali?

Yebo.

Waqala nini ukuba ne-akhawunti yasebhange futhi wawuyivula kuliphi?

Ngo-1996, ngisaqala enyuvesi. Ngayivula eStandard Bank.

Ekukhuleni kwakho yini oyikhumbulayo nowayifunda ngemali?

Ngafunda ukuthi imali inendlela yayo yokuziveza kanti uma ungayihloniphi iphela ngokushesha.

Waqala nini ukusebenza kanti kwakuyimalini umholo wakho wokuqala?

Ngaqala ukusebenza ngo-1999, umholo wami wokuqala kwakuR4 000.

Wawenzani umholo wakho wokuqala?

Ngawunika ugogo ozala ubaba.

FUNDA NALAPHA: Kuleli sonto kuSAZIWAYO NEMALI sikuphathele u-Eugene Mthethwa wodumo lweTrompies, inkakha yekwaito nowummeli oyisishoshovu samalungelo amaciko nobuye aziwe ngelikaSimply Eugene. Usanda kukhipha icwecwe elithi Let Dogs Lie Low

Yini into enhle ongathi usuke wayenza ngemali?

Wukwakha ikhaya nokwakha indlu yesonto lomphakathi wamaRoma eMgababa ngakithi.

Yiliphi iphutha elithinta imali osuke walenza?

Wukuyisebenzisa budedengu.

Wake walutheka mhlawumbe ngokudlala ibhanoyi?

Angikaze.

Yisiphi iseluleko esihle owasithola ngemali?

Imali kufanele uyihloniphe, uyiphathe kahle futhi uyithathe njengento ebaluleke kakhulu.

Uma ungawina uR1 million kwiLotto ungawusebenzisa kanjani?

Ngingathutha endaweni engikuyo manje, ngiqashise abafundi basekolishi engiseduze nalo ukuze ngenze inzuzo.

Ungabeluleka uthini abanye abasemkhakheni wakho ngokuphatha imali?

Amaciko amaningi amosa imali emahhotela nasezindlini eziqashisayo. Amaciko awatshale imali ezintweni ezizoba ezawo, hhayi ezintweni zesikhashana ezifana namahhotela noma amaflethi; ngoba asuke esiza umasitende kanti uma uthenga umuzi usuke ukhokhela into ekuzoba ngeyakho. Awayiphathise okwezikhali zamaNtungwa.