Abasafufusa babonga ithuba lokukhangisa nokuthola amakhasimende amasha. UNQOBILE NDLOVU noSANDILE GWALA bayabika
OSOMABHIZINISI besifazane bathole ithuba elingandele bani lokukhangisa ngemikhiqizo kwi-African Women in Leadership International Conference (i-AWLO) eRadisson Blu Hotel eMhlanga, eThekwini, KwaZulu-Natali, ngesonto elidlule.
Ukweseka osomabhizinisi besifazane ngenye yezinto ebezimqoka kule ngqungquthela. Imibukiso inika osomabhizinisi ithuba lokukhangisa ngezimpahla zabo, ukuhlangana nabantu abangase batshale imali emabhizinisi abo nokuxoxa nabanye osomabhizinisi.
Labo somabhizinisi bancome abahleli bengqungquthela. UNks uYamasa Ceesay, usomabhizinisi waseGambia nodayisa imvunulo yesintu, ubekhangisa ngemvunulo ehlobe ngemibala egqamile.
Uthe ulwazi alutholile akazukugcina ngokulisebenzisa ebhizinisini lakhe kuphela kodwa uzokwabelana ngalo nabanye abantu besifazane uma esephindele kwelakubo.
UNksz u-Azande Ndebele, umsunguli weShlobo Designs, inkampani yaseThekwini ekhiqiza izikhwama zesikhumba ezenziwe ngesandla, imigexo namacici uthe izingqungquthela ezinjengeye-AWLO zimvulela umnyango wokukhangisa ngomsebenzi wakhe emakhasimendeni amasha akwamanye amazwe.
Uthe: “Ngemicimbi efana nalona, kusho ukuthi ngiyakwazi ukungenisa kwamanye amazwe. Ingqungquthela isinika ithuba lokukhula njengoba isilethela abantu abaqhamuka kwamanye amazwe e-Afrika.”
UNksz uNandipha Msebenzi, umsunguli nomnikazi we-Aluda Arts, inkampani eyenza imigexo namacici naye uthe uyalijabulela ithuba lokukhulisa umsebenzi wakhe.
Uthe: “Ngikholwa wukuthi lena yindlela enhle yokukhulisa ibhizinisi lami ngabantu abathengayo nabanye abangahle bathenge ngelinye ilanga.”
INdlela’s Village yinkampani eyasungulwa nguNkk uNonhlanhla Ndlela ngo-2009. Idayisa ifenisha nomsebenzi obaziwe kanti nayo ingenye yalezo ebezikhangisa.
UNkk Ndlela uthe yena akuhlomule engqungqutheleni wukufunda ngamanye amasiko nokukhangisa ngebhizinisi lakhe.
Uyilungu lenhlangano i-The Untouchable Cadres, eyasungulwa ngabafelokazi baseManzimtoti, eningizimu yaseThekwini. Inhloso yayo wukukhuthaza abantu abafelokazi ngokwenza izinto ezihlukene njengobuciko, ukuthunga, ukupheka, ukuqeqesha intsha neziboshwa ukuze zizoba namakhono ahlukene.
Bekukhona noNksz uNtandoyenkosi Mthethwa, umnikazi weNYM Group, inkampani ekhiqiza izikhwama ezihlobe ngemibala yase-Afrika ezisetshenziswa ezingqungqutheleni, ukufaka izimonyo nokunye.
Uthe izingqungquthela ezinjengeye-AWLO ziyithuba lokuhlangana nokwazana nabantu abasha nokukhangisa ngebhizinisi lakhe.
UNkk uFuthi Mkhize, umsunguli wenkampani ekhiqiza izimonyo namaphilisi ezihlanganiswe ngezithako zemvelo kuphela nezingaxuntshwa namakhemikhali iNgimnyama Ngimuhle neDr Phyto Medicinal Plants uthe: “Ngihambela imibukiso efana nalena ngoba siyakhula njengenkampani, ngakho sidinga ukwaziwa.
“Kuyasijabulisa ukuthi kwanda amathuba okuthi sithole amakhasimende kwamanye amazwe e-Afrika. Ingqungquthela ye-AWLO iyithuba elihle,” kusho yena.