Uphendule uthando lomlando wamagama abantu nezibongo lwaba yibhizinisi elivuthayo. Uxoxe noSIMANGALISO NTSHANGASE
ESEYINGANE ubekhonze ukwazi kabanzi ngencazelo yamagama abantu nomlando wezibongo zabo. Kuthe ngokuqhubeka kwesikhathi wasebenzisa ubuciko bokuhlobisa ebhala izincazelo zako ezenzela nje, kwagcina sekuyibhizinisi.
UMnu uNgikhona Mpila, oneminyaka ewu-27 waseMadadeni, KwaZulu-Natali, uwumsunguli weMy Name World Wide, ibhizinisi lezithombe azenza esebenzisa ubuciko bokuzibhala zikhange kuhlotshiswe ngazo endlini.
Enaba ngokusunguleka kweMy Name World Wide, uthi ukhule ewumuntu okhonze ukwazi kabanzi ngomsuka wamagama abantu nezithakazelo zabo, nokuthe uma eseqala leli bhizinisi wagxila ekwenzeni izithombe ezichaza ngakho.
“Ngemva kokuphothula umatikuletsheni ePhendukani High School ngo-2012, ngifudukele eGoli ngiyokwenza i-architecture e-University of Johannebsurg ngo-2013, nokho angangakwazi ukuphothula izifundo zami ngenxa yemali.
“Ngo-2017 ngithole umfundaze wokwenza i-BCom Accounting e-University of Western Cape (e-UWC), nakhona ngenza unyaka owodwa, ngashiya phakathi ngoba ngase ngifuna ukusebenza ngiziphilise. E-UWC ngihlangane nabantu abaningi engingabazi noningi labo elingamaXhosa. Ngangiqala ukuzwa amagama abo futhi ngingawazi ukuthi asho ukuthini, loko okwenze yakhula ngokuphindiwe intshisekelo yami yokwazi kabanzi ngawo,” kulanda yena.
Uphindele eGoli eyofuna umsebenzi, nokulapho eqale khona ukwenza lezi izithombe zokuhlobisa ezichaza ngamagama abantu nezithakazelo zabo ngo-2017.
“Ngaqala ngenza isithombe ngisebenzisa amagama kadadewethu, nokwathi uma esesifaka ezinkundleni zokuxhumana abantu basithanda. Ngaqhubeka ngibenzela mahhala, ngagcina ngiphoqeleka ukukwenza ibhizinisi ngo-2017 ngibona kwanda isibalo sabazifunayo,” kulanda uMpila.
Uthe ukwenza lezi zithombe kuqala kuR250 kuya kuR4 800 usebenzisa i-canvas print, i-contemporary footprint ne-wallpaper installation.
“Ngihlose ukufundisa abantu ngamagama nezithakazelo zabo, ngaloko ngikwazi nokwenza ubuciko namasiko kube sesitayeleni ngisebenzisa ubuciko.”
Uthi ukwenza isithombe ngasinye kuthatha izinsuku ezinhlanu kuya kweziyisikhombisa izithombe ezincane neziwu-10 ezinkulu ngoba kudingeka azinike isikhathi futhi enze nocwaningo lomsuka wegama nezithakazelo zamakhasimende akhe kwesinye isikhathi.
Esaqala uke wabhekana nenselelo yokungakwazi ukubhalansisa umsebenzi nebhizinisi nokungabi nazo izinsizakusebenza ezanele, kodwa wakunqoba ngokuhamba kwesikhathi.
Uthi ukuba sebhizinisini kumfundise ukubaluleka kokuxhumana nabantu kahle nokuhlonipha amakhasimende.
Ucebisa abafuna ukuqala ibhizinisi ukuthi bangakuvilapheli ukushintsha imicabango yabo bayenze ibhizinisi.
“Kodwa baqikelele ukuthi baqala ibhizinisi elehlukile nelizoba yisixazululo sento ethile emphakathini bese beba khona ngokugcwele emabhizinisini abo ukuze asimame,” kusho uMpila.
Ufisa ukuthi iMy Name World Wide ibe namahhovisi, igcine isiyaziwa umhlaba wonke njengoba esevele eseqalile ukudayisa eminye imihlobiso yakhe eMelika nase-United Kingdom.
Facebook: My Name World Wide
Instagram: mynameworldwide
- Umbele unesivumelwano noLindo Makhaye weLusizo, owenza uhlelo Notha Ujule Ngolwazi kuKhozi FM. Osomabhizinisi esibhala ngabo ngamabhizinisi abo engosini Asafufusa kungenzeka kukhulunywe ngawo kulolu hlelo