UNEMINYAKA ewu-22 asungula inkampani ehlela imicimbi nezingqungquthela. Kunokuthi atatazele uma kuhlasela iCOVID-19, uqinise ekubhekeni amathuba amasha kwezinye izimboni kanti nakhona ekuhlelweni kwemicimbi kuqhamuke izindlela ezintsha. USihlalo we-Ikhono Thrive Global uxoxe noSLINDILE KHANYILE

KWASHESHE kwamcacela uma eqala ukuhlela imicimbi ukuthi uselutholile ubizo lwakhe nokungakho namanje esaqhubeka nalo msebenzi yize sekukhona ushintsho endleleni okwenziwa ngayo ngenxa yokuhlasela kweCOVID-19.

Empeleni kuyena ukuhlela imicimbi ukuthatha njengenkonzo nokungakho umcimbi ofana nalona wokuthuthukisa osomabhizinisi abancane eThekwini, osuwaziwa ngeDurban Business Fair, kungeminye yaseyenze isikhathi eside.

UNksz uZodwa Msimang uwuSihlalo we-Ikhono Thrive Global, obesekunesikhathi eside yaziwa nge-Ikhono Communications. Namhlanje le nkampani isinezinkampani eziyisithupha ngaphansi kwayo okuyi-Ikhono Communications (yezokuxhuman nokukhangisa), Ikhono ICE (ehlela imicimbi), Ikhono Furniture Hire (eqashisa ngefenisha), iLOM Events Solutions (ehlinzeka abenza imicimbi ngobuxhakaxhaka bomsindo), iDestination Management Company (ehlelela abafisa ukuvakasha uhambo), Ikhono Suites (eyezakhiwo) neKings and Queens ehlela amakhonsathi omculo wokholo.

Okwenziwa, wuNksz uMsimang, oneminyaka engu-50, kuhlomulisa ngezindlela ezimbili. Okokuqala kusiza ngokuthi ezinye zezinto abazisebenzisa uma behlela imicimbi njengefenisha, izinto zokuhlanganisa umsindo sebenazo ngaphakathi nokusho ukuthi abasaziqashi futhi kwabona bayabolekisa ngazo.

Okwesibili wukuthi inkampani yakhe ayisagxilile emkhakheni owodwa, nokungesinye sezifundo athi ukubonile ukubaluleka kwaso njengoba kuhlasele iCOVID-19. Eminye yemiphumela yalesi sifo wukuthi simise ukusebenza kweminye imikhakha, okubalwa nemicimbi ngoba ukubuthana kwabantu abaningi ndawonye kumele kugwenywe.

“Awukwazi ukuthembela emkhakheni owodwa ngoba uma kwenzeka into enzima njengoba kwenzekile, kungaphela ngawe,” kusho yena.

Enaba ngokunye akufunde njengoba kuhlasele lolu bhubhane uthe bafundile nabo ukwenza imicimbi ngezinye izindlela njengoba sebeke benza umcimbi wohlobo i-hybrid, okusho ukuthi abanye abantu babakhona emcimbini bukhoma kanti abanye baba yingxenye yawo ngokusebenzisa ubuchwepheshe.

“Okunye engikufundile ngami uqobo wukuthi kusekuningi okunye engisengakwenza emhlabeni mina njengoZodwa,” kusho uNksz uMsimang.

Kufika iCOVID-19 nje ubenesikhathi esingaphezu konyaka ehlele kabusha inkampani yakhe njengoba eyiqambe nakabusha wathi yi-Ikhono Thrive Global nokuhambisana nanezifiso nezinhlelo zabo zokusabalalela kwamanye amazwe.

Usezinhlelweni zokwengeza kulezi zinkampani ezikhona njengoba ezokwethula isitolo sezimpahla zokugqoka zabantu besifazane abazimukile, abagqoka u-size 38 kuya ku-44 futhi uzokwethula nesitolo esitholakala kwi-internet esidayisa izimonyo zomzimba namakhandlela esibizwa nge-Le Gift.

“Umuntu uma eneminyaka engu-21 esaziphuphela uma eqala ukusebenza wayaye athi uzothatha umhlalaphansi uma eseneminyaka ewu-50 kodwa akukho lokho manje,” ukhumbule loku ehleka.

“Nginikwe ukuthi ake ngibheke izinto ezintsha, mhlawumbe ezingafukuzisi kakhulu ngoba umuntu kade ayefukuza bo. Selokhu kwathi nhlo ngiwumuntu okuthandayo ukuphana izipho, ngibe senginikwa leli gama elithi Le Gift ukuthi izimonyo angiziqambe ngalo nokuhambisana nanokuthi wonke umuntu uyisipho esithile emhlabeni. Omunye uzozibuza ukuthi wayenikwa wubani, ngisho uMoya oNgcwele. Namakhandlela kade ngawathanda, kuphela wukuthi manje sengizowenza mina kunokuwathenga.

“Ngangiye ngicabange ukuthi ngeke ngalunga kwi-retail ngoba ngingasanganelwa yikhanda uma kungangenanga muntu esitolo kodwa-ke manje kunezindlela ezintsha ngoba sizoba online, noma kungathenganga muntu kodwa ngizobe ngingenayo irenti okumele ngiyikhokhe,” kusho uNksz uMsimang.

Sesivele sikhona isimonyo sokugcoba umzimba, i-body butter kanjalo nesibulalamagciwane.

Ziningi nezinye izinto eziqhamukile ngesikhathi kuvalwe izwe njengoba naye ebengomunye wabantu abathule izinhlelo zezingxoxo ezinkundleni zokuxhumana, nezisaqhubeka namanje.  

NgoLwesine uba nengxoxo nomuntu ofundisa ngezwi likaNkulunkulu kodwa isimenywa sosuku akusho ukuthi kusuke kuwumfundisi. Lezi zingxoxo zibizwa ngeThriving in Abundance. NgoLwesibili ukhiphela eshashalazini abesifazane abasemikhakheni enhlobonhlobo ohlelelweni iWoman Thrive.

UNksz uMsimang ukhulele KwaMashu, lapho efunde khona. Nokho umatikuletsheni wawuphothula KwaDlangezwa, eMpangeni. Wabe esedlulela Ongoye, lapho enza khona iziqu ze-BA Communication nePsychology. Wabe esefundela nokuba uthisha. 

Ziningi izifiketi anazo zokuphathwa kwabantu nezinkampani kanjalo nokuthuthukiswa komphakathi. 

Eqala ukusebenza waba wuthisha isikhashana ngaphambi kokuya enkampanini eyayigxile ekwenzeni imisebenzi enhlobonhlobo namabhizinisi kahulumeni afana neTelkom neTransnet.

Ukuqala kwakhe ukwenza imicimbi kwaqhamuka ngokuthi bacelwe wuMnu uThami Mazwai, owayewumhleli wephephabhuku lamabhizinisi i-Enteprise, ukuthi babasize ngokubahlelela imicimbi eyayiba khona njalo ngenyanga ihlanganisa osomabhizinisi, kwaba wukujoveka kwakhe kuze kube manje.

Emva kokuhlaba ikhefu lokuthola umntwana ngo-1999, wabuya emsebenzini wahlala kancane wabe esephuma inxiwa ngo-2000. Uke wahlela Umkhosi woMhlanga iminyaka emithathu kanti ngo-2005 wathola ithuba lokuba sethimbeni elalihlela ingqungquthela efaka amazwe omhlaba, iWorld Chambers Conference.   

“Ngike ngihlangane nabantu bamangale ukuthi namanje ngisayihlela imicimbi. Wubizo lwami lolu… empeleni yinkonzo ngoba ngiyakuthanda vele ukuxhumanisa abantu. Yingakho kwathi uma umuntu ethola ithuba lokwenza umcimbi wokuthuthukisa osomabhizinisi abancane, wabona ithuba lokuwukhulisa njengoba saze saphakamisa ukuthi awushintshwe igama ube yiDurban Business Fair. 

“Ukuhlela imicimbi kudinga (ukuthi) ube wumuntu oqaphelayo nezinto ezincane, ube nesineke, isibindi futhi ukwazi ukuguqula isimo masinyane uma kuphoqa. Abanye abantu baxakwa yiloko kodwa mina yinto engiyiyona vele leyo futhi ngiyayithanda into engiyenzayo. Ngiyakuqonda nokuthi yisinkwa sami lesi, hhayi nje mina kuphela kodwa neminye imindeni ewu-10 ephila ngaso,” kusho yena.

Ukuthi usephokophela yonke le minyaka akusho ukuthi bezingekho izingqinamba osomabhizinisi ababhekana nazo. Uthi enye yazo bekuyaye kube ngeyokuthola izisebenzi ezizoqonda uhlobo lomuntu odingekayo kule mboni yabo.

“Ibhizinisi lakho lihambisana negama lakho. Ngakho uma umsebenzi owenzayo ungekho ezingeni, loko kwenza nawe uqobo ubukeke kabi.  Uyedwa umuntu esengake ngamxosha, abanye obekucaca ukuthi abayizwa ngaphakathi le ndlela esisebenza ngayo bebevele bazihambele; bengikhuleka nje ukuthi akahambe.”

Usesungule inhlangano engenzi inzuzo, i-Ikhono Foundation. Igxile ekusizeni intsha ukuthi ikwazi ukuthuthukisa amakhono ayo, ikakhulukazi adingeka manje, kanjalo nokusiza abafelokazi basemakhaya ukuze bakwazi ukuziqonda kahle bezokwazi ukuziphilisa nokuthi imali iphathwa kanjani ukuze ikusebenzele.

UNksz uMsimang uneminyaka eyisithupha ewumfelokazi kanti unabantwana ababili. Ukhonze ukucula, ukuvakasha, ukufunda izincwadi, ukuzijabulisa ngokuyobhucungwa umzimba nokujima ngokuhamba yedwa.  

Izeluleko azinike osomabhizinisi abasafufusa: 

• Yithande into oyenzayo ukuze noma kuqhamuka izinselelo uzokwazi ukumelana nazo. Akungabi wumthwalo kodwa akukujabulise okwenzayo;
• Nakekela ngendlela imali. Ngikubonile futhi lokhu njengoba kuneCOVID-19, sikwazile ukugcina lonke ithimba lethu, saphila ngemali ebesiyibekile kanti mina ngoba kukhona nezinye izinto engizenzayo eceleni, ngikwazile ukuthi ngibheke kuzona; akwangadingeka ukuthi nami inkampani ingibhekelele;
• Yazi ukuthi yikuphi lapho ungena khona nokuthi yini ongakwazi ukuyenza futhi yini ongeke ukwazi ukuyenza. Ungabambi yonke into.