Kuthulwe ‘iSilicon Valley’ yaseThekwini ezovulela intsha amathuba obuchwepheshe obusamuntu
WUBONISWA MOHALE
INTSHA yaseThekwini izohlomula ngamakhono obuchwepheshe nolwazi lobungcweti njengoba Umhlanga Hills Tech Connect izokwakha ingqalasizinda nobuchwepheshe obulekelela ama-call centre izovula nekolishi.
Umhlanga Hills Tech Connect, inkampani ezothuthukisa ingqalazisinda nobuchwepheshe ngoR25 billion, esungulwe ngabatshalimali baseNingizimu Afrika neHuawei ukwenza ubuchwepheshe obusamuntu nobunye obenza lula umsebenzi wama-call centre nowokuthutha izimpahla ngobuchwepheshe.
Emcimbini obusemahhovisi aseFNB eMhlanga, eThekwini ngoLwesihlanu, isikhulu siphezulu sale nkampani uMnu uFrank Mni sithe Umhlanga Hills Tech Connect uzobaseCornubia kanti uzobanekolishi lokufundisa intsha amakhono obuchwepheshe, i-warehouse nezinye izinsiza ezizodinga izisebenzi eziwu-100 000.
Uthe bazosebenzisana neFNB ukuthi ibasize ngezimali zokwakha inkampani yabo njengoba iza nobuchwepheshe obuseqophelweni eliphambili.
FUNDA NALAPHA: Kuqashwe abantu abasha abawu-8 180 embonini yezingcingo
Siletha isizinda sobuchwepheshe eNingizimu Afrika esizocishe sifane neSilicon Valley yaseMelika. Umehluko wukuthi esethu isizinda sobuchwepheshe sizomukela abantu abasha kungakhathaleki ukuthi baphuma emindenini eswele.
“Okwethu wukuhlomisa intsha ngamakhono bese siyinika imisebenzi kule mboni yethu,” kusho yena.
UMni uthe bazokwazi ukukwenza loku ngoba iNingizimu Afrika inentsha eningi futhi uhulumeni uyabaseka bengabatshali mali.
Imenenja kaMasipala waseThekwini uMnu uMusa Mbhele ithe ingqalasizinda ye-Umhlanga Hills Connect izoqinisekisa ukuthi leli dolobha lihamba phambili kwezobuchwepheshe futhi inciphise isibalo sentsha engasebenzi.
“Kuhle ukubona abatshalimali beza ngobuningi eThekwini, basazoza nabanye ngoba simatasa nezinhlelo zokubaheha. Ngesikhathi kunezibhelu ngo-2021 kuhlasela nezikhukhula, abantu abaningi babezitshela ukuthi kuphelile ngathi kodwa siyavuka manje. Sizanentuthuko yobuchwepheshe ezokhulisa umnotho futhi idale nenqwaba yemisebenzi ehambisana nobuchwephe,” kusho yena.
Kulinganisawa ukuthi lo msebenzi uzothatha iminyaka emithathu nezinyanga ezimbalwa ukuwuphothula.
Usonkontileka ozoyakha uMnu uKen Qin wePowerChina uthe ukuthakasela kakhulu ukuthi beza eThekwini, wathi lo msebenzi uzonakekela imvelo ngoba ngeke kumoseke amanzi, ngoba umoya wokupholisa imishini enolwazi oluhlukene uzobe ungayilimazi imvelo.
Imenenja yeFNB KwaZulu-Natali uMnu u-Asheen Magjee uthi bayakujabulela ukusiza inkampani ezoqinisekisa ukuthi lesi sifundazwe sibayisizinda sobuchwepheshe, ukwenza izinto ngendlela entsha futhi elwa nenkinga yokusweleka komsebenzi.
Lo msebenzi usekwa yiHhovisi likamengameli nelikandunankulu wesifundazwe, abathumele imiyalezo abatshalimali bebagonga ukuthi sebezoqala umsebenzi.