IJULILE EYOMASIPALA
NGESONTO elidlule umCwaningimabhuku-Jikelele uNksz uTsakani Maluleke ushicilele umbiko okhombisa ukuthi iphathwe kanjani imali komasipala ngonyaka wezimali u-2021/22. Lo mbiko uveze ukuthi bahlehlele emuva omasipala.
Isibalo somasipala esithole imibiko engenagcobho sehlile sabawu-38, sisuka kwabawu-41 ngo-2020/21. Omasipala abawu-104 bathole imibiko emihle kodwa enogcobho, isibalo esikhuphukile sisuka ku-100, kwathi abathole imibiko emibi futhi enogcobho behla besuka ku-83, baya ku-78.
Abathole imibiko emibi bayisithupha besuka kwabane, kwathi abathole imibiko engahlanganiseki kwakuhlanganiseka banyuka bafinyelela kwabawu-26 besuka kwewu-15 ngonyaka wezimali odlule. Kukhona abawu-16 abangayilethanga nhlobo imibiko yabo, isibalo esinyukile sisuka kwabathathu ngonyaka wezimali odlule.
UNksz uMaluleke uthe esinye sezizathu esibe nesandla kulo mphumela wukushintsha kwabaholi bepolitiki komasipala ngenxa yokhetho lohulumeni bezindawo ngo-2021.
Lo mbiko ulandelwe ngomunye owenziwa yinkampani ecwaningayo iRatings Africa. Umbiko wayo, i-2022 Municipal Financial Sustainability Index, okowucwaningo olwenziwa komasipala besifunda abawu-104 nama-metro ayisishiyagalombili ezweni, uveze ukuthi omasipala abawu-107 basengcupheni yokungabinamali nhlobo.
Lolu cwaningo luveze ukuthi imbangela wukuthi amakhansela akhethiwe awakwazi ukuphatha nemigomo yokuphatha imali engasebenzi kahle.
Ayikho into evezwe yile mibiko yomibili engakaze ishiwo phambilini. Ukuhluleka komasipala ukuphatha imali ngendlela efanele akuphazamisi nje ukuhlinzeka izidingo zezakhamuzi kuphela kodwa kuphazamisa nokusebenza kwamabhizinisi.
Amabhizinisi adinga ugesi, amanzi, izimvume zokusebenza nenye ingqalasizinda, imisebenzi edinga omasipala. Ukusebenza kahle komasipala kusho ukuthi amabhizinisi nawo asebenza endaweni lapho engakwazi ukuqhuba umsebenzi ngaphandle kokuphazamiseka. Omasipala banesandla ekuheheni nasekuxosheni abatshalimali.
Omasipala banesandla ekukhuleni nasekuntegeni komnotho. Uma osomabhizinisi besebenza endaweni ehlelekile ngokwezidingo eziqhamuka kumasipala, maningi amathuba okukhula, okusho ukwanda kwemisebenzi, okulekelela ukunciphisa ububha nokungalingani kwabantu.
Isikhathi sokuloku kubatshazwa izinto ezingasebenzi ngendlela sesiphelile. Iyadinga ukuthi ibukwe ngeso elibanzi le ndaba yokungasebenzi ngendlela yomasipala. Ukubheda kwezinto komasipala kukhinyabeza umnotho.